【中環在線】李小加：解放軍不應介入港內部事務 - 李華華
適中字型
較大字型
近兩個月香港人之間嘅對談，十句不離由反送中引爆嘅連串社會運動，連港交所（388）行政總裁兼港區全國政協委員李小加都忍唔住講兩句，仲要係最敏感嘅「一國兩制」同「解放軍」。
金融界一直擔心最極端情況，港府或要求駐港解放軍出動，但小加喺噚日嘅金融午餐會中主動提及，解放軍任務唔應該介入香港內部事務，香港治安應由警隊解決，「無論對警隊意見如何，一定要讓香港警察做好其工作。」
雖然小加冇正面回應解放軍一旦出動，會否衝擊對香港金融中心的信心，但睇返資料，恒指喺8964翌日急瀉超過20%，可想而知金融界有幾擔心。
對於深層次嘅一國兩制，李小加認為港人恐懼「廿三條」通過後失去「兩制」，中央則恐懼港人普選制度通過後反對「一國」，但兩者其實有一致理想，就係香港繼續係自由、開放和法治延續嘅國際大都會。佢話，只要中央對維持「一國」有信心，就會落實普選、港人治港的「兩制」。
李小加一向都話其身份不宜評論過多非金融事宜，今次如此「盡訴心中情」，華華真擔心佢會俾阿爺「照肺」！
李華華
mailto:LiWaWa@AppleDaily.com
LiWaWa@AppleDaily.com
中環在線 - 李華華 舊文
來源 source: http://hk.finance.appledaily.com