智取大市 - 晉佳 2019年7月3日
【智取大市】破頂股一去冇回頭 - 晉佳
中美進入新一輪談判，對港股而言，足以成為一個強而有力嘅反彈理由。 資料圖片 適中字型 較大字型
近期唔少中美貿易戰嘅股市分析，十分有趣。G20峯會之前，唔少分析都話要小心啲，峯會後中美暫緩新關稅兼休戰，明明係好消息，但啲專家又話係意料之內，市場早已反映，咁究竟邊句先啱？我寧願相信好消息未盡反映，結果噚日港股升勢確實相當不俗。
牌面上，中美進入新一輪談判，對投資者嚟講係製造一段安全期，足以成為一個強而有力嘅反彈理由。
長期有美國減息憧憬、短期有貿易戰暫緩，至於習特會亦反映特朗普重視選票，短期內出口術只會被視為靠嚇，令市場間中震盪，但不至於大跌，投資者風險胃納增加，股票逐步落入好友之手，估計未來幾個月，大漲小回機會相對大。
噚日反映貿易戰戰情好轉之下，理應係周期股大反彈、增長股蝕底之日，但偏偏強勢股、破頂股、增長股升勢相比周期股有過之而無不及。睇嚟資金不理估值、不問價買破頂股成為趨勢，冇蟹貨之下就越升越有，形成兩極化，持有已破頂股份，未來幾個月將繼續係王道，升到你唔信，創52周新高嘅增長股，只要見調整就可吸，持有嘅就不妨繼續hold住，例如頤海（1579）、海底撈（6862）、澳優（1717）、李寧（2331）、美東汽車（1268）、亞泥（743）、奧園（3883）等等。
晉佳
http://fb.com/advanceguy1
本欄逢周一、三、五刊出
智取大市 - 晉佳 舊文
來源 source: http://hk.finance.appledaily.com