收市閒情 - 千頌C 2019年7月31日
【收市閒情】賤咀英揆點睇中國？ - 千頌C
英國首相約翰遜喺當選前，接受鳳凰衛視訪問時表明心跡係「pro-China」。 資料圖片 適中字型 較大字型
近幾年民粹興起，繼美國、菲律賓都選出政治狂人做總統後，最新英國亦由約翰遜入主唐寧街。呢位Mr. Johnson，頭髮雖然時刻處於八號風球狀態，但吹佢唔脹嘅係，睇落永遠唔旱不毛躁；但講到份人，似乎相當繞口劖手，咁多年來把口完全唔收，mean到一個點。
對於特朗普，佢試過咁樣形容：「我唔會去紐約某啲地方，其中一個原因係，我有機會見到特朗普。」對於普京，佢又咁講：「雖然普京有啲似小精靈多比，但佢其實係一個無情、控制慾強嘅暴君。」
今次佢成功「拜相」，大家當然非常關注佢點睇中國，如果你覺得佢會寸習近平，咁大家恐怕要失望啦。
想當年，佢做倫敦市長，就已經對中國投資者、學生大表歡迎。喺佢當選前，佢接受鳳凰衛視訪問，亦表明心跡係「pro-China」，「very enthusiastic about the Belt and Road Initiative」。至於貿易戰嘅風眼華為，英國《衛報》引述佢嘅顧問指，約翰遜好可能放生華為，畀佢向英國供應5G零件。若然真係咁樣做，無疑係唔畀面特朗普。
不過大家要知道，約翰遜係一個點嘅人。想當年，佢喺《泰晤士報》做Intern，就試過作新聞，最後下場係點？當然係俾人炒；到脫歐公投時，又為拉票刻意作誤導標語。你見佢咁積極推動脫歐，但你又知唔知佢做倫敦市長時，卻曾主張開放移民政策？
不想而知，佢係一個為達成目的，將形象放埋一邊嘅人。今日就同你伸出友誼之手，過兩日亦可以反轉豬肚見到屎。特朗普都講過當習近平係Friend啦，佢同特朗普有個共通點，就係本身最大形象就係冇形象，怕咩做無賴？曾經有人講過，「我冇追House of Cards好耐啦，睇Donald Trump點玩法仲峯迴路轉啦。」𠵱家再加埋約翰遜，睇怕未來國際政壇，應該更腥風血雨。
千頌C
http://fb.com/winbigwok
本欄逢周三刊出
收市閒情 - 千頌C 舊文
來源 source: http://hk.finance.appledaily.com