智取大市 - 晉佳 2019年8月26日
【智取大市】績優重要過貿戰 - 晉佳
美團季績靚到爆，意外轉盈，顯示公司已擺脫困難時期，股價長線升勢估計更能確立。
互聯網圖片 適中字型 較大字型
周五晚美股大跌、港股黑期跌約600點，反映咗中國向美國750億美元進口貨加徵關稅，當時係人都預咗美國有報復行動。
收市後特朗普嘅大招，或許略為加大負面程度，牌面睇港股或低開逾600點。要留意特朗普本來將3,000億美元嗰部份收10%關稅，喺美國已出現強大阻力，加上中國買農產品慢慢咁買，雙重打擊特朗普選票，特朗普強行收足關稅等同送自己一程，提早送自己去面對「通俄門」調查。市場會冷靜反映負面因素，估計同過往貿戰加劇情況相若，單日大跌已足夠反映，然後洗牌再玩。
美團（3690）剛公佈季績，結果靚到爆，意外轉盈，假設將季度業績乘4倍，市盈率60倍。王興話第三、第四季要注意有季節性不利因素，咁大膽淡化未來業績利好程度，更反映管理層信心。由於美團市佔率持續上升兼外賣滲透率未來只升不跌，季度收入會繼續有增長，加上業務處於增長周期，經營槓桿甚高，仲要未完全反映大數據、AI、自動駕駛等等長遠利好因素，業績顯示公司已擺脫困難時期，股價長線升勢估計更能確立。
港股大跌但業績勝預期，一來一回未知股價如何反映，但即市受壓的話，就係低吸機會。
晉佳
http://fb.com/advanceguy1
本欄逢周一、三、五刊出
智取大市 - 晉佳 舊文
來源 source: http://hk.finance.appledaily.com