操盤手札記 - 割柑人 2019年9月17日
【操盤手劄記】習式新一國兩制 - 割柑人
一場修例風波，亦令港人醒覺，原先一國兩制版本將會玩完，由習式一國兩制版本取代。 資料圖片 適中字型 較大字型
今個中秋，民怨沸騰。對於香港亂局，官媒新華社、《人民日報》，以至中央政法委，分別撰文指修例風波背後嘅深層次矛盾之一源自房屋，又指既得利益集團囤地牟利，阻礙發展。換言之，又係土地問題！共產黨最叻鬥地主，今趟第一個鬥李嘉誠！
另一方面，國資委上周喺深圳同近百國企高層開會，要求國企更積極投資香港，加強對港企嘅控制權。以中資換港資！講到換血，一場修例風波，亦令港人醒覺，原先嘅一國兩制版本將會玩完，由習式嘅一國兩制版本取代，原香港人退場，新香港人登場。
李嘉誠被鬥，其實唔多關囤地事，只因一句「網開一面」辣㷫中央。以新界囤地計，長實（1113）跑輸恒地（012）、新地（016）、新世界（017）九丈幾遠。而近年喺新界囤地最活躍嘅係中資地產商，包括雅居樂（3383）、綠景（095）、中旅（308）、萊蒙（3688）。
林鄭睇中央頭，對動用《收回土地條例》軟化；配合政法委文章提到「收地建屋，刻不容緩」，似乎土收事在必行。問題係政府會唔會大細超，對港資土收，對中資則用「公私合營、土地共享」不作土收，為地產霸權換血部署。
周一，人行降準半厘落地，不敵經濟數據走樣，加上油價飆升，中港股市分別回吐0.02%同0.83%。恒指收27124，二萬七關見支持，走勢未算太差，後市聚焦「超級星期四」，美、日、英、瑞央行公佈議息結果。
中美貿易戰似緩非緩，最新嘅箭靶係中車（1766），據《紐約時報》報道，美國國會即將通過國防授權法案，當中包括禁買中國製造列車，以防其為「間諜列車」，監視美國民眾，白宮已表支持。法案一旦通過，中車勢受影響，不宜沾手。
割柑人
本欄逢周二刊出
操盤手札記 - 割柑人 舊文
來源 source: http://hk.finance.appledaily.com