操盤手札記 - 割柑人 2019年9月24日
【操盤手劄記】中美角力趨向鬥硬 - 割柑人
中美角力，趨向鬥硬，令大市增添風險。資料圖片 適中字型 較大字型
剛過去嘅周末、周日，示威衝突升級，警方防暴、臥底四出，血腥場面頻現。美國國會本周將會審議《香港人權與民主法案》，據講喺制裁方向上，可能轉至警暴。現時中美博弈兵分兩路，其一打貿易牌，其二打人權牌，兩者都令大市增添風險。
喺中美貿易談判再遇阻滯、美國即將審議上述法案下，中港股市周一攬住碌低近1%。恒指收26222，六連跌兼六連陰。以黃金比率計，由8月中低位24899升至9月中高位27366，回吐升幅50%，可見26133，若果跌穿則確認反彈浪告終，或將下試回吐升幅61.8%，即見25842。
美國國會周三開始討論上述法案，之後再呈大會表決，民主、共和兩黨都已表態支持，預計最快10月中通過，再交總統簽署成為法律。林鄭提倡嘅「We Connect」，唔止將香港各階層connect，仲將美國朝野兩黨connect！
中國外交部兩度抨擊該項法案，例牌嗰句「中國內政不容外國幹涉」；官媒《環球時報》更警告，若行呢步「死棋」必遭報復。不過，該項法案係美國國會草擬嘅對外法案，屬於美國內政，中國基本上無從制止。只要國會有三分二票數通過，總統都無得say no。
中美角力，趨向鬥硬。白宮新任國安顧問奧布萊恩（Robert O"Brien）剛宣佈，委任博明（Matt Pottinger）為副國安顧問。博明係對華鷹派，主張貿易戰。佢曾任路透社同《華爾街日報》駐華記者，嘗過政府打手拳毆；又曾引用《論語》，同駐美大使崔天凱爭辯。
中美貿易談判唔多樂觀，投資宜審慎。不過，中國十一國慶在即，市場憧憬中央會喺國慶前推出刺激消費政策，若想短炒，不妨留意內需消費股如食品股，當中，主打悠閒食品嘅旺旺（151），毛利率較同業高，短炒之選。
割柑人
本欄逢周二刊出
操盤手札記 - 割柑人 舊文
來源 source: http://hk.finance.appledaily.com