金手指 - 孫柏文 2019年9月24日
【金手指】歐盟腳軟因豬隊友？ - 孫柏文
英國首相約翰遜。資料圖片 適中字型 較大字型
孫柏文現身在倫敦，睇到英國政局之亂、民怨沸騰嘅程度同香港不相伯仲。
我以前都講過好多次，英國佬衍生出國會呢個物體，係因佢哋係最暴力嘅民族（始終係入侵他國嘅健力士記錄保持者）。不過呢刻，佢哋國會完全代表唔到民意，甚至嚇嚇逆民意。英國差佬仲未使放催淚彈嘅原因，係首先佢哋之前嚴重錯判形勢嘅女領導，自動下台。第二，就係國民覺得好快有機會大選，趕曬啲逆民意嘅立法機關代表走。
英國同香港一樣，社會都係問緊自己「邊個話事先？」新英揆就話英國人當家作主，反對派則要推翻2016年公投結果，繼續留歐。
無論新英揆Johnson點嗌，歐盟都話之前畀前任May嘅脫歐條約，一字不能改、一步不能退。點知，越來越「留」嘅工黨，上周出現爆破點。佢哋嘅影子外交大臣話，如工黨執政，就會重新同歐盟傾新脫歐方案。傾完就叫多次公投，跟住工黨會反自己傾返來嘅方案，全力撐留歐！一講，全國譁然。
原本見到英國越亂越開心嘅歐盟政府，忽然醒覺，原來佢哋神級隊友，淪為最弊神豬級，所以呢幾日歐盟政府態度都急速軟化。所以，如果你要賭英鎊升，呢刻就應該揸英鎊。直至歐盟宣佈新方案，Johnson走出來話好正之日，就平倉。
孫柏文
獨立股評人
http://fb.com/shuen
本欄逢周二刊出
金手指 - 孫柏文 舊文
來源 source: http://hk.finance.appledaily.com