冰說聰明 - 青冰 2019年9月26日
【冰說聰明】市寬不足 A股有危機 - 青冰
茅台今年5月曾試過回調15%，唔知下次回吐是否真爆煲，只知現時跟車太貼，肯定唔夠水位轉身。資料圖片 適中字型 較大字型
要數今年最強的股市，非A股莫屬，上證升兩成，滬深300指數及A50指數都升約三成。不過強國唔好自high住，去年全球最差的股市，亦是A股，上證全年跌25%，歷史上跌幅排第二，僅次於2008年，所以今年咁犀利，只能講係收復失地而已。
早幾日青冰看彭博新聞，指滬深300今年升三成，但只有三分一的股份是跑贏指數，跟2015年及2017年相比，兩次升市都有約一半股份跑贏指數，而今年有一半的升幅，更加是來自10隻股份，當中幾隻大家都識，如茅台、平保及五糧液。傳統智慧話，升幅過於集中在少數股，證明市寬唔夠，其他股跟唔上並唔健康，有幾間投行更明言，A股大調整在即。
指數升幅由少數股份頂住，相信作為港股投資者，這個情況並唔陌生，大家可以睇返2017年的升市，當時大部份時間都係靠騰訊（700），情況誇張到，市場人士將恒指戲稱為騰指。
講返A股，今年A股大價股咁勁，主因係MSCI及富時兩大指數，正式將A股納入，吸引千億資金入市，由於那些大價股比重大，指數基金焗住照單執藥，主動基金即使好叻揀股，都唔敢唔買茅台吧，適逢國慶70周年，內地基金應該醒目，不會貿然沽貨，幾種力量加埋，令這些大股水漲船高。
這些因素是否可以持續至年底，甚至更長的時間，大家或可參考早兩年的騰指，當時全世界都話騰訊有買貴無買錯，大小基金全部揸實，看淡的似乎只有沈大師。情況同現時的茅台差不多，不過戰友又唔使驚住，當日騰訊兩次從高位急挫15%後再創新高，第三次跌才真爆煲，恒指亦從此見頂，茅台今年5月曾試過回調15%，青冰唔知下次回吐是否真爆煲，只知現時跟車太貼，肯定唔夠水位轉身囉。
青冰
http://fb.com/chingbing888
本欄逢周四刊出
冰說聰明 - 青冰 舊文
來源 source: http://hk.finance.appledaily.com