【異動尋寶】兩隻熱炒股的操作部署（魏力）
恒指低位挾升1,000點後，開始窄幅整固，重熊區呢兩日清哂，下一批要去到26900至27000，街貨都加得幾勁，似乎過兩日都會破位再上。目前市況仍是炒兩樣嘢：一、貿戰有得傾；二、美聯儲放水。只要兩大因素無變，就可以繼續搵嘢炒，至於是炒指數定個
股，其實悉隨尊便，睇自己心理質素同技術。
個股方面，開始見部份熱炒股批股，寶龍地產(1238)以先舊後新配售1.466億股新股，每股5.4元，較上日收市折讓8.6%。以寶龍近日升幅來講，折讓唔算好大，但一開市就穿配股價，可以等消化一輪，再企穩批股價樓上先買番。寶龍8月份出通告，建議分拆物管業務「寶龍商業管理」上主板，是下一轉炒作的催化劑。
至於近排強到無朋友的雅生活(3319)，昨日終於肯跌，藉口係盤前有一個5,000萬股大手上板，每股21.18元，涉資逾10億元，以公司92億市值來講，絕對係大數目；此外，上板價亦較上日折讓近8%，難怪成為出貨藉口。
雅生活上月尾公佈收購中民物業股購，管理面積一躍成為行業龍頭，資金狂追落後，股價亦由16.5起步，炒到上週五最高23.3元，累升41%，9RSI一度接近90，回吐其實非常合理，亦無需要第一棍回落就飛身撲入，太早，回氣唔係一兩日；20天線目前19蚊，追緊上來，個人比較傾向20天線先出手。
筆者為證監會持牌人，未持有上述股份財務權益。
www.facebook.com/2012jason
異動尋寶 - 魏力 舊文
來源 source: http://hk.finance.yahoo.com