操盤手札記 - 割柑人 2019年10月8日
【操盤手劄記】Endgame生還者 - 割柑人
全球衰退風險增加，各國央行放水救市，債息出現跌勢。過往債息下跌，房託如領展都會受捧。 資料圖片 適中字型 較大字型
潘朵拉盒子打開！上周五，特首林鄭引《緊急法》頒佈《蒙面法》，辣㷫市民上街，防暴警察群出，港鐵（066）首度全線停駛、逾30商場落閘、超市閂門，戒嚴咁款。林鄭啟動《緊急法》，跳過立法程序，已動搖香港作為國際金融中心嘅基石。
按港鐵、長和（001）財務報表推算，港鐵封站一日，客運同車站商務損失7,800萬元；長和本地零售（主要係百佳、屈臣氏、豐澤）停業一日，損失1.2億元。過去三日，皆因一條惡法，眾多商戶自動「罷市」，經濟損失條數點計？要問雷鼎鳴教授！
「反送中」引發嘅抗爭，已延續四個月，街頭衝突升級，企業盈利受損。香港內有街戰之憂，外有貿戰之患，第三季GDP難免再錄負增長，出現技術性衰退。香港亂局係咪irreversible？雖然潘朵拉盒子裝滿邪惡之物，仍有唯一好嘅，就係「希望」！
港股喺十連陰後，上周出現三連陽，可惜《緊急法》令陰燭再現，恒指收25821，跌1.1%。10月係傳統股災月，今年兩度險守嘅24900關料受考驗。中美貿易代表本周埋枱，據講中方企硬補貼冇得傾；不過，聯儲局本月有望減息、量寬，後市未至太淡。
港股上周應跌唔跌，係咩無形之手托住？最大可能係美國將會重啟量寬。全球衰退風險增加，各國央行放水救市，債息出現跌勢，被視為無風險資產嘅美國10年期國債孳息低見1.52厘。過往債息下跌，房託如領展（823）都會受捧。
不過，香港正值政經交困，零售疲弱，租金趨跌。8月零售按年急跌23%，珠寶鐘錶最傷，跌近五成，超市貨品最硬淨，升1.9%。超市主打民生消費，領展商場亦然，影響尚算有限，料可維持穩定派息，回購亦有助支持股價，逆市生還。
割柑人
本欄逢周二刊出
操盤手札記 - 割柑人 舊文
來源 source: http://hk.entertainment.appledaily.com