大棋局 - Mr. Tregunter 2019年11月26日
【大棋局】香港人冇鬆懈的本錢 - Mr. Tregunter
區選後逼於現實，相信中共會稍為正常處理香港反送中引發的問題。但這種正常狀態能維持多久難講，香港人冇鬆懈的本錢。 資料圖片 適中字型 較大字型
大國之爭，總會研究對手性格。有傾向，就可以引導對方去指定目的地。典型如二戰期間，美國搵嚟人類學家潘乃德研究日本人民族性，寫下一本《菊花與劍》。此書影響戰後美國接管日本的方略，以及80年代同日本打貿易戰時的策略。書中研究日本人民族性，以「恥感」二字概括。
中國人亦有恥感，中共當局近年就幾次提及百年屈辱。再加上中共信奉階級鬥爭，任何事原本有一萬種方法處理，最後總會傾向鬥爭到底。世界文明不斷進步，為政者人活在2019年，個腦卻留在1966年。在中美外交關係出現變異之際，中共處理香港反送中事件的手法讓國際清楚睇到，其性格、傾向、行事方式冇進步過。
習近平最近分別就香港及貿易戰問題開腔，通常代表兩種可能性。其一係在下者不認同決策層，陽奉陰違，雖然口唔講，但行動上抵制或消極處理。中美貿易談判時中方代表常遲到，讓習近平一人入席，有此跡象。其二係在上者認為自己嘅聲音，輾轉傳達後會有偏差，而這種偏差可能故意或無意，所以要親自開口。問題在中國官場向來奉行講一大餐等你唔知佢講乜，意思係你看著辦。件事做得成，你叻仔，但係應份；件事做衰咗，係你自把自為，在上者不沾身。
正常狀態難持久
政府以高壓方式鎮壓香港人，不斷以虛話、謊話、廢話敷衍搪塞。埋尾之前著力宣傳示威者對城市破壞，相信民意已經逆轉，加上手中握有近百萬鐵票以為食硬。香港人心中明白，整個抗爭運動蚍蜉撼樹勝算不高，但越來越多香港人也洞察一點，香港係一個平台，一個凸顯不義之平台。只要香港人保存對公義之追求，對是非曲直之執著，中共每打壓一分，就係中共離自絕於世近一分。
內地流傳一段話：「如果尖銳的批評完全消失，溫和的批評將會變得刺耳。如果溫和的批評也不被允許，沉默將被認為居心叵測。如果沉默也不再允許，讚揚不夠賣力將是一種罪行。」由於中共決策層判斷當下為百年未有之大變局，因此執意將中國改造成數碼利維坦國度，以為這是最佳應對方法。香港人抗爭，係因為香港人不想讚揚不夠賣力而被入罪。
區選後逼於現實，相信中共會稍為正常處理香港反送中引發的問題。但這種正常狀態能維持多久難講，香港人冇鬆懈的本錢。
Mr. Tregunter
本欄逢周二刊出
大棋局 - Mr. Tregunter 舊文
來源 source: http://hk.entertainment.appledaily.com