金手指 - 孫柏文 2019年12月17日
【金手指】英揆無原則 英鎊難測 - 孫柏文
英揆約翰遜係超級牆頭草，完全冇原則，又鍾意用花言巧語，搞gag當做咗。資料圖片 適中字型 較大字型
早兩個月前，孫柏文喺本欄做過好幾個關於英國嘅預測。上周英國舉行大選後，係時候睇番中咗幾多個。
首先，我話過10月31日嘅脫歐限期，一定被推遲。先中。跟住我話過嗰班當時賴死唔走嘅國會議員，將會喺脫歐限期推遲後，批准大選。中。
而我話過硬脫派將會喺選舉大勝。呢個既中又唔中。原因係保守黨確實大勝，而佢哋雖然話會有同歐盟嘅協議（即近乎一切照舊，好似冇脫過咁，直至傾掂未來關係）下脫，但亦同時話要歐盟破曬佢哋嘅速度紀錄，喺一年內傾掂。咁傾唔掂時，2021年1月1日會點？又硬脫？定係又跪低求延期？
最難測係因英揆約翰遜係超級牆頭草，完全冇原則，又鍾意用花言巧語，搞gag當做咗。咁嘅領導下，真係冇得估政策會點。
我亦話過叫大選嗰刻沽英鎊，到市場覺得硬脫派會贏，令英鎊大插之際就平沽轉揸睇升。但當牆頭草做首相，風向難測，未來可由硬脫至只係紙上假脫都仲得，英鎊走勢亦難估。
最後，如果英國走在美國前，當年脫歐公投爆冷成侵侵當選先兆。美國民主黨現在走緊英國工黨路線。即陶傑日日吸濕大笨象般抽嘅咩多元文化、乜都免費等新左膠主義水。而民主黨內唔信新左膠主義嘅嗰批人中，拜登輸硬。唯一有得同侵侵隻抽嘅，就只得Buttigieg。
孫柏文
獨立股評人
http://fb.com/shuen
本欄逢周二刊出
金手指 - 孫柏文 舊文
來源 source: http://hk.entertainment.appledaily.com