創業起義 - 尹思哲 2020年1月8日
【創業起義】肚餓自然識得夢醒 - 尹思哲
WeWork變殭屍企業，經此一役，投資者軟銀已經改曬作風，轉趨保守。 資料圖片 適中字型 較大字型
識得唔少創辦人，平時食飯吹水，好少講夢想，但轉頭接受媒體訪問，又見到佢大談遠景同夢想。我覺得無可厚非，因為大眾媒體嘅真正老闆，係大眾，而大眾最需要嘅，係夢想。鍾意談夢想、講遠景嘅創辦人，我都識唔少，但除咗接受媒體訪問之外，另一個共通點，係佢哋都籌咗唔少嘅VC錢。
世界好現實，往往係有條件有能力嘅人，至可以講夢想，對Startups嚟講，最大條件同能力就係「使人哋啲錢」，當你用緊燒緊投資者嘅錢，你梗係可以大談夢想理想遠景同增長，因為投資者係用錢支持你咁做。
睇返數據，2018成個亞洲有42間Startup做咗獨角獸，舊年得返23間，實際金額更冇咗3分之2，得返210億美元。換言之，真正嘅資本寒冬已經到咗亞洲，連印尼最大獨角獸Gojek嘅Andre Soelistyo亦親口承認咗。而問題將會繼續惡化，首先作為最黐線嘅獨角獸投資者軟銀，自從WeWork一役之後，亦已經改曬作風轉趨保守。其次係美中科技戰前提下，過往一批標榜「跨境」嘅VC，由於資金亦要歸邊，投資中國初創及獨角獸嘅VC錢，未來幾年勢必大減。
重點係，假如唔使獲利係代表發夢，而獲利優先係代表夢醒，咁未來繼續仲有條件有能力發夢嘅創辦人，係絕對冇問題；至於已經夢醒，早幾年一直執行獲利優先嘅創辦人，亦都完全冇問題。
問題將會出喺一直發夢，但未來將失去條件嘅創辦人身上。如果到呢一刻，佢哋已意識到危機、立即奉行獲利優先，2020年則尚有機會扭轉局面。但假如，創辦人此刻仍然相信大眾媒體嘅吹奏，昏睡於融資尋夢嘅世界，我只能夠祝他好運：肚餓也許不是壞事，因為肚餓自然識得夢醒，但怕只怕夢醒時一切經已太遲。
尹思哲
http://linkedin.com/in/wanszezit
wanszezit@gmail.com
創業起義 - 尹思哲 舊文
來源 source: http://hk.entertainment.appledaily.com