大棋局 - Mr. Tregunter 2020年1月7日
【大棋局 】美國即將開伊朗波 - Mr. Tregunter
在美國主導的世界秩序底下，伊朗拒絕美國秩序，當美國要在國際能源出口市場插旗，伊朗自然有嘢要受。 資料圖片 適中字型 較大字型
中東問題離唔開石油，先睇三條數。據美國能源資訊局（EIA）數據，美國去年9月原油淨出口8.9萬桶，係1949年有紀錄以來，第一次成為原油淨出口國。EIA同時預計今年美國原油淨出口將會提升至每日75萬桶，同過去各大行及石油組織預估美國2020年會躋身原油淨出口國預期一樣。此其一。
國際能源署（IEA）去年末公佈的報告指，今年全球石油需求約每日增加120萬桶，但非OPEC產油國的產量會每日增加210萬桶。就算OPEC減產，今年全球石油仍會供過於求，每日供應過剩100萬桶左右。此其二。
伊朗被制裁前，每日出口200萬桶油。受美國制裁後，美國國務卿蓬佩奧講明要伊朗原油出口歸零，藉此逼伊朗「做回正常國家」。現時坊間估計伊朗每日仍有10-50萬桶原油出口，中國珠海振戎公司去年即因為違反美國禁購令，向伊朗入口原油而被制裁。此其三。
伊朗問題，癥結其實很清晰。全球所有已知石油蘊藏量，伊朗佔十分一，伊朗天然氣資源亦排世界第二。在美國主導的世界秩序底下，伊朗拒絕美國秩序，當美國要在國際能源出口市場插旗，伊朗自然有嘢要受。
上述為經濟財貨層面，由阿富汗到伊拉克戰爭，只要攤開地圖一睇就明白。伊拉克，在伊朗西面；阿富汗，在伊朗東面。兩場戰爭過後，伊朗被夾在其中。加上美國盟友沙地、以色列包圍，中東成個場大部份由美國睇。但俄羅斯兩個重要盟友，伊朗及敍利亞仍佔重要位置，高加索能源走廊個場仍然由俄羅斯睇。
美國目標好清晰，就係伊朗。特朗普2017末已講明係暴風雨前的寧靜，明示同伊朗有關。貿易戰如一個金剛圈，原本用來笠住中國呢隻甩繩馬騮，再騰出手去處理中東問題，但特朗普或許冇估到貿易戰拖咁耐。貿易戰第一階段初定，係時候回過頭去處理中東。
重頭戲在，當美國要對伊朗落刀時，俄羅斯冇可能坐視不理。伊朗一失，敍利亞冇得守，俄羅斯在中東勢力將被逼出。中國與伊朗的關係，從華為以及進口石油事件，中國原本想摻一腳，蓋一帶一路兩大中途點就係中東及南海。一旦中東被美國完全握於股掌之中，一帶一路將成空話。是以美國殺巴格達迪，係埋尾，但殺蘇萊曼尼，係開始。
Mr. Tregunter
本欄逢周二刊出
大棋局 - Mr. Tregunter 舊文
來源 source: http://hk.entertainment.appledaily.com