早前，澳門關閉賭場，結果牽一髮動全身，與賭場相連的餐廳、表演場地，甚至乎酒店
也跟住關門大吉。可以見到，大生意可以唔做，但做大事，係要快、狠、準。
多日來澳門確診數字沒有再增加，昨日，各大小賭場終於重開，當中沒有一家夠膽大肆宣傳，也沒有大鑼大鼓和載歌載舞，大部份都只係簡單出個post，單色加張酒店相就了事。澳門的賭場、酒店、食肆生意，絕大部份來自大陸旅客、繼而日本、韓國、台灣。現時四周圍疫情依然嚴重，日夜擴散，尤其係大陸同日本，所以就算賭場開番，都唔見得有好多人來，又或者話好多人想來都來唔到，而且根本沒甚麼值得慶幸，倒不如越低調就越好。
相比起香港，放眼死氣沉沉，可能就只有當買到廁紙，打個卡放上facebook，才是近排最值得開心的。中環、SOHO、尖沙咀的店舖越關越多，十室九空，唔單止係怕咗疫情，而係經濟上頂唔住，零售食肆經歷咗一個低迷再接住另一個谷底，同以前沙士的確好唔同，睇唔到任何曙光。
這一代香港的小朋友，剛經歷過暴力血腥、大量催淚彈、水炮車洗禮，然後緊接就係日日戴口罩、洗手洗手、人人停課的世紀疫情。「幸福」兩個字，似乎離開這一代越來越遠。
另一邊廂，從屋村超市的日用品斷貨、街坊師奶頻撲張羅、跟住黑社會為咗千幾蚊要打劫廁紙，再去到連那間位於長江中心地庫的高級超市，每當午飯時，一眾中環儷人、金融才俊都抱住大條大條的廁紙、紙巾和清潔用品，看到他們臉上那恍如打勝仗的慶幸，又或者賺咗股票的滿足表情，你才真正意識到，香港今次真係好大鑊。
文迪晞
mailto:heyadmen@gmail.com
廣告經綸 - 文廸晞 舊文
來源 source: http://hk.entertainment.appledaily.com