當大家仲擔心緊武漢肺炎之際，美國民主黨總統初選，原來對於港股市場已呈現頗大影響。
早喺月初時，民調顯示對華強硬派桑德斯支持度只係接近前副總統
拜登，去到個幾星期前已經大逆轉，桑德斯開始拋離其他對手，拜登比起黑馬布蒂吉格形勢還要差，相信桑德斯較大機會成為特朗普嘅終極對手。對華強硬派抬頭，於是美國國防部隨即轉軚，話唔反對阻止美企出口零件畀華為。如果一場武漢肺炎有份令美國民主黨嘅對華強硬派上位，呢場疫情嘅影響力真係夠曬戲劇性。
桑德斯勝出初選嘅話，意味住特朗普會加碼打擊中國去爭取選票，中港股較大機會維持2018、2019年跑輸美股嘅狀況，再加上肺炎短期重擊經濟，周期股更加偏弱，手機設備股亦因美國打壓而弱勢。由於舊年爆升嘅增長股裏面，消費股、阿里（9988）、美團（3690）之前被疫情重創，令資金選擇更少，馬後炮都要講返轉頭，呢個情況令到網上醫療股阿里健康（241）、平安好醫生（1833）、物管股強上加強，不過近期氣勢已減弱，跟住資金流去邊，博一轉受疫情影響嘅消費股、新經濟股？總之繼續避開周期板塊才是王道。
晉佳
http://fb.com/advanceguy1
本欄逢周一、三、五刊出
智取大市 - 晉佳 舊文
來源 source: http://hk.entertainment.appledaily.com