【智取大市】港股將弱上加弱 - 晉佳
港股嘅優質周期股進入超買階段，反映大路股開始欠短期勝算，整體市場風險正上升。
資料圖片
上周市傳特朗普發功對華進行疫情報復，特朗普回應傳媒提問，指將會以關稅作為對中國嘅終極懲罰。近期美股反彈相信足夠讓特朗普向財閥交差，以其慣常操作，會等股市高位對華
展開新一輪攻擊，以鞏固其票倉。既然消息已傳出，特朗普亦打埋開口牌，似乎時辰已到，爭在幾時撳掣。美國制裁中國，慣常會阻止資金流入港股，令美股跑贏港股，換言之，港股嚟緊會一路比美股弱。
值得留意係優質周期股進入超買階段，例如中建材（3323）、銀娛（027）已明顯突破保歷加通道上軸，係中短線見頂先兆，通常高位chok幾日然後下跌。至於增長股美團（3690）出現同樣情況，向來亦係步入調整徵兆，反映港股嘅大路股開始欠短期勝算，整體市場風險正上升。另外，港股大跌市反彈過後月份，通常呈現月線圖陰燭。種種跡象顯示，周一高開過後直至月底，恒指向下機會偏高。弱勢股如滙控（005）仍有機會追一轉落後，但呢類股向上突破反而伏味甚濃，買入隨時套牢。
呢一刻若有持股拋離保歷加上軸走勢，理應沽出，不宜進行換馬博追落後。沽咗貨之後，毋須強行投入市場，務求keep多啲現金，等下次市場恐慌再算。
晉佳
http://fb.com/advanceguy1
本欄逢周一、三、五刊出
智取大市 - 晉佳 舊文
來源 source: http://s.nextmedia.com