【笑到最後】未買齊貨點應對 - 高明
最新蘋果公司發行債券集資85億美元，息率最低見0.75厘，可視為為回購作準備。 資料圖片
有分析指，到今年年底，聯儲局嘅資產負債表，會達10.5萬億美元。究竟呢啲數字係咩概念？
2008年9月儲局資產負債表約8,900億美元，同年年底已經大升至2.24
億美元。當時破萬億美元已經嘩嘩聲，年年放風話出年第四季收水，之後係出年第四季前放更多水。啲錢掟咗去買債及買按揭抵壓證券，係咪等於個市會即刻升？08年9月至12月標普最多跌49.22%，但拉長計，呢十年間，資產負債表上升5倍，美股最終大約升3倍，香港樓市不同級別升2至5倍，港股相對只係升三至四成。
香港樓市上升有其宗教原因。但美股嘅升因更具創意，發明咗集體回購。企業回購股份自古有之，但個別一兩隻股份回購，以往只係當間接派息，幫股民慳返利息稅。近年美股集體借平錢進行回購，賺錢嘅，做；蝕錢嘅，更加做，所以不論企業係賣業績，定係賣未來，總之今日唔買，聽日貴幾嚿，形成股壇合謀定價，最終一齊焗買製造漫長大牛市。
最新蘋果公司發行債券集資85億美元，息率最低見0.75厘，係自2013年以來同類債券最低息率，擺明借國難財，但亦為再回購作準備。香港方面，近期則有李嘉誠父子狂買長和（001）及長實（1113）。正如上面所講，一間買冇用，如果港股龍頭廿零三十間一齊買，先有牛市。
資金氾濫令資產價格喺過去十年暴升，金融市場未必一模一樣發生，但明顯趨勢係收益縮窄，因為武肺後生意難撈，任何有稍為穩定收益嘅資產都會掃，好似蘋果債咁。過去十年，香港政府用辣招同收緊按揭，減低供應，喺QE之下挾高樓價；未來十年，上任大半年嘅金管局總裁余偉文個人投資上好似已經買齊貨，千祈唔好唔記得未齊貨嘅大多數啊！
高明
http://fb.com/bigricetea
本欄逢周一刊出
笑到最後 - 高明 舊文
來源 source: http://s.nextmedia.com