【利字當頭】滯脹的不祥之兆 - 利世民
疫情全球大爆發，幾乎冇一個國家唔受影響，各國政府嘅擴張性貨幣政策，可能引起滯脹。資料圖片
聯儲局主席鮑威爾接受訪問嘅時候話，除非武漢肺炎有疫苗，否則都好難見到信心，經濟亦難以全面復蘇；時間上，恐怕要等到2021年底。換句話說，呢次真係二次大戰後
最嚴重嘅經濟衰退。
疫情剛剛爆發嘅時候，我真係好灰；原因係今次嘅全球大爆發，幾乎冇一個國家係唔受影響。以前我哋經歷過嘅每次經濟危機，都可以透過改變資產組合嘅exposure；由一個地區，轉去另一個，趨吉避凶。七十年代覺得美國唔得，咪亞洲新興市場囉。到九十年代末，亞洲又好似唔係幾得，咪返美國囉。
武漢肺炎，對全球化最明顯嘅兩個影響：一，就係大家對全球供應鏈嘅反思；但呢個影響係中長期，可能要好幾年先至見到實質嘅reconfiguration。二，最明顯，最即時嘅影響，就係各國政府或多或少都進一步透支。
大多數發達國家嘅政府，都已經有財赤，就算香港作為世界上極少數有財政盈餘嘅地方，亦都蒸發咗唔少儲備。當然，香港唔似得其他地方，可以借貨幣政策去增加流動性，但各國政府嘅擴張性貨幣政策，或多或少都影響到香港嘅資產市場。最有可能出現嘅情況，就係資產回報率繼續低迷，甚至進一步下降，但資產價格持續高企，亦都係所謂嘅 yield compression。有人叫呢種情況做「焗炒」，但我會話呢個係滯脹（Stagflation）之下嘅不祥之兆；滯脹，唔單止會令社會更分化，亦都會令財富更集中。即係話，2021年見到復蘇，恐怕已經係最好嘅局面，我最怕係到時見到嘅唔係真復蘇，而係只有小部份人因財富效應造成嘅虛幻太平，就好似1920年代嘅情況。
利世民
http://fb.com/leesimon.hk
本欄逢周二、四刊出
利字當頭 - 利世民 舊文
來源 source: http://s.nextmedia.com