【Can Bank】李澤鉅香港精神 - 銀子
講金唔講心的李澤鉅早排主持股東會，問起商場有無減租，冇正面回答。 資料圖片
講金唔講心的李澤鉅早排主持長和系股東會，問起商場有無減租，嚴格上冰山總裁上無答YES/NO，「為不同租戶提供度身訂做方案」，即延長租約期、遲交租免罰息、甚至
加強商場推廣都算數，到底有無減得租客業主知，但重點在於形容某啲租戶有「香港精神」，轉型快、影響細。
能夠令數佬李澤鉅感到欣慰租戶想必轉型的同時跑夠數交租，才能夠觸動李生講到啲形而上的字句。事關減爭取減租幾乎是近期唯一令黃藍綠大團結的事。長實系內和黃地產位列惡人榜榜首，傳聞租賃部惡到掛起電話，租戶求情減租電郵無視，並且先後入稟紅磡黃埔花園大眾書局同吉野家欠租。有租戶話，誠哥幾億派錢，點解唔減租？搞清楚，捐錢係誠哥私人慈善基金，而商場租金就要對股東負責。
今日形象如同大慈善家的李嘉誠，1998年被問到向嘉湖山莊撻定業主追討差價時，已講明做慈善同生意要分開，連用輿論施壓呢套唔受。
秉承長年龜殼般財務紀律的長和，老闆今日重提香港精神，相信當中關於合約精神的部份依然廿年如一日。
P.S.散子小休一期
銀子
http://fb.com/散子-257101397966975
Can Bank - 散子 舊文
來源 source: http://s.nextmedia.com