【金手指】硬食的身心準備 - 孫柏文
香港行到歷史嘅呢刻，已成世界大戰嘅其中一個戰場。 資料圖片
由盤古初開，金銀價嘅差距，大約喺10至20倍。即用10至20盎斯嘅白銀，就買到1盎斯嘅黃金。今時今日，呢個差距係100倍。當然，喺3月中時，呢個差距近150倍。
今日，孫柏文唔係想話白銀抵
買之類嘅說話。而係想同大家分享，歷史中對上一次個差距有咁大，就係1939年，希特拉臨揮軍打波蘭，令西方世界也參與二戰前嘅一刻。香港行到歷史嘅呢刻，已成世界大戰嘅其中一個戰場。喺呢啲亂世，用歷史借鏡，令我滿腦問題。我都特登問來自澳洲珀斯嘅獅子山學會創會主席，當年1941年12月，日本偷襲珍珠港同佔據香港後，三個月內新加坡都淪陷埋時，喺澳洲珀斯啲人嘅感受係點？
再諗，唔通真係要諗保命為先？錢，唔通搵個喺香港仔嘅化糞池，將啲錢包膠放入去，等平亂後再攞返出來？
英雄、炮灰，只差一線。有啲可能會成為前馬會、房協主席祈德尊爵士咁，就算日本捉佢入深水埗軍營，佢都被營救後繼續打日本皇軍。
至於我？如果做到戰前營救猶太小朋友嘅Nicholas Winton，我已經好滿足。我唔知有幾多讀者喺我幾年前話「搵夠好走」時，有聽話。不過今日咁嘅時勢，真係身、心、錢嘅機動性，勝於一切。個浪來緊，你會企喺咩位硬食呢？
孫柏文
獨立股評人
http://fb.com/shuen
本欄逢周二刊出
金手指 - 孫柏文 舊文
來源 source: http://s.nextmedia.com