【利字當頭】中共會驚乜嘢？ - 利世民
對中共來講，香港金融中心只係一個工具，當工具唔聽使，咪用過第二件囉。 資料圖片
仲有幾日，人大就會用「附件三」呢道「法制後門」，強行將國安法加之於香港。
惡法，定義就係冇人知，自己幾時會點樣俾人指控犯法。跑過大陸都知，就算簡單嘅商業糾紛，假如對
家有勢力有背景，你就唯有吞咗啖氣。就算一大班消費者有冤無路訴，都唔係新聞。點解大陸有上訪呢種咁封建嘅現象？咪就係因為雖然話推翻帝制咁多年，但本質上仍然係一個封建嘅制度。香港不幸嘅宿命，就係要被呢個落後嘅社會吞噬。
「香港人，有甚麼了不起？」大陸嘅權貴，接受唔到一個殘酷嘅現實，就係佢哋嘅特區，自貿區，乜區物區，就係點都做唔到國際金融中心。點解？因為佢哋從來都唔明白，金融中心唔係鋼筋水泥加一班西裝友就可以「建構出來」。金融中心嘅靈魂，係合約精神，係願賭服輸，係講過算數；一個連《中英聯合聲明》都唔承認嘅政權，你叫我點信？又或者，中共根本唔介意香港係唔係咩國際金融中心；對中共來講，金融中心只係一個工具，當工具唔聽使，咪用過第二件囉。
好灰咁睇，中共既然連「附件三」呢條屎坑橋都用埋，就唔介意全世界點睇，點反應。制裁？預咗喇，反正都新冷戰，遲早都會發生。咁嘅情況下，仲講咩國際金融中心地位吖？
究竟仲有咩可以令中共會驚？話說，歷史嘅教訓係，呢片土地上面嘅政權更替，革命，貴族奪權，外族入侵等等，都只不過係更具戲劇性嘅情節，但政權倒台嘅原因，永遠都係財困。我就唔信一個政權可以長期承擔沉重嘅軍事同維穩開支。話止於此。願天祐我城，榮光歸於香港。
利世民
http://fb.com/leesimon.hk
本欄逢周二、四刊出
利字當頭 - 利世民 舊文
來源 source: http://s.nextmedia.com