【智取大市】金銀爆升要提防 - 晉佳
金價及銀價近排爆升，引人注目。 資料圖片
黃金白銀近排爆升，唔覺唔覺民生飲品食品股亦由7月起轉強，蒙牛（2319）破位，潤啤（291）、青啤（168）慢升，中糧肉食（1610）逐步向好，資金流向似乎反映投資者逐漸注視通脹。
聯儲局講過，令市場正常運
作，兼且令經濟、勞動市場同通脹保持正常，係目前最大任務。美國M2喺短短4個半月狂升超過18%，年度化計係近五成增幅！雖然最近數字顯示M2年度化升幅放緩至逾兩成，但對比疫前日子依然算瘋狂印鈔，金融市場產生泡沫，鮑威爾講明don’t care。疫情過後，高失業率成定局，如果同時高通脹，將成為大難題。
睇返美國CPI由8個組別計算而成，包括房屋、交通、食品、醫療、教育同通訊、娛樂、服飾以及其他商品同服務，其中，房屋嘅比例最大，估計佔四成左右，CPI房屋一項，算式主要計算租金而非樓價。疫情過後估計失業率高企，租金難大升，因此炒高股樓其實未必拉高CPI數字，未知聯儲局個如意算盤打唔打得響？
美國6月CPI重拾升勢，按月升0.6%，係追返之前部份跌幅，而8月中公佈嘅7月數字頗為關鍵，目前市場預期按月升0.3%，還算可控。聯儲局印鈔機喺7月頭兩個星期仍高速啟動，但如果稍後M2升幅減慢，就可能預示聯儲局擔心惡性通脹，對升市產生直接威脅，值得留意。
晉佳
http://fb.com/advanceguy1
智取大市 - 晉佳 舊文
來源 source: http://s.nextmedia.com