金融High Tea——仍未看到低撈滙控理由
隨著限聚令收緊，本地商界人人唉聲歎氣，不過港股主要跟中美走，恒指連日急跌後反彈169點，升幅主要集中喺內地科企，滙控（005）更逆市下跌，跌穿11年前的「海嘯價」，再見多年新低。
滙控下周公佈業績前夕，傳出有意出售美歐業
務，本來賣產係好消息，可惜現在西方金融資產不值錢，加上滙控夾在中美兩國的政治戰中，搞到股價不但全無反彈，甚至出現浪比浪低。有中環茶友在滙控叫停派息後立即跳車，現在回望暗呼僥倖，認為今次走得快好世界。
茶友睇番自己跳車經歷，認為能夠當機立斷，完全因為自己無心魔。好多人買滙控都有感情因素，一係自己係公司客戶，一係曾經買該股賺過錢，又或者覺得香港不可能無滙豐，認為長揸無得輸。
幾年前錯失回港時機
茶友兩、三年前上車，主要係公司宣佈回購計劃，兼且派高息。由於滙控股價低過帳面值，公司回購會反映資產價值，所以買來博收息賺價，這個策略初期相當成功，茶友仲喺高位逐步減持部份股份。不過，年初聽到公司連已宣佈的股息都取消派發，覺得公司唯一賣點都失去，於是全面沽貨一股不留。
滙控有點命蹇時乖，去年總部吉祥物銅獅子被火燒，跟住政治麻煩就找上門，一方面中國要求銀行就《港區國安法》表態，對家美國又表示不滿。近日又傳出中國翻舊帳，指責公司出賣華為高層孟晚舟。茶友慨歎滙控有點似香港人，以前係左右逢源，現在就搞到左右不是人。若然滙控喺幾年前把握機會，把總部遷回香港，減少在英美曝光，或者情況會好一點。現在中國同英美不斷開火，滙控無論走同不走，都會被其中一個猛轟。
滙控股價未止瀉，輸家之一係中國平安（2318），比較幸運係平保只係買入滙控作為投資，未有要求派人加入董事局，以其組合規模都未至於太傷。若然平保以自己為主要股東，提出要加入董事局，咁隨時就會火燒上自己身。
滙控在上次世紀疫情時經營仲係有聲有色，「沙士滙控價」近百元絕不失禮，2007年更高見150元，後來全球金融海嘯，股價大插跌穿40元，當時震驚市場。昨日大笨象低見34.1元，創逾11年新低，終降1.6%，收報34.8元。現時集團帳面值69.4元，折讓接近50%，數字非常低廉，本來賣產應該係好消息，最慘係美英業務現時變了包袱，雖然想賣，但何處找買家係一大難題，遑論賣個好價錢，所以消息未能帶來刺激。從股價陰陰落而成交不多，反映沽貨壓力不大，只係有興趣沾手的人仲少，令股價拾級而下，茶友暫時亦看不到有扭轉這個劣勢的苗頭。
禁堂食煤氣見三年低位
傳統藍籌失色下，恒指又係靠科企帶動反彈，收報24772點，升169點；成交總額縮減至1124億元。科技指數登場第二日升幅顯著，收報7012點，升237點。騰訊（700）股價上漲4.5%，收報543.5元，東風汽車（489）擬申請首次公開發行A股，於深交所創業板掛牌，股價獲資金推高13.5%，收報5.8元，可見想短炒都係要留意北面吹甚麼風。
禁堂食措施今日開始，大摩指勢損煤氣（003）業務，股價創逾三年低位，低見10.64元，收挫0.4%，收報10.88元。煤氣之前宣佈末期業績時，把紅股派送比例，由多年來的10比1減至20比1，有老股東聞到異味，只係感情影響沒有減磅，跟住新冠肺炎橫掃香港，雖然大家宅在家多了煮食，但始終食肆用量大過家庭好多。搞到連過去的跌市鐵股都支持不住，可見疫情殺傷力有幾大。
陸羽仁
金融High Tea - 陸羽仁 舊文
來源 source: http://hd.stheadline.com