【大棋局】特朗普深水炸彈 - Mr. Tregunter
美國總統特朗普。 資料圖片
恒指補回26000點周線裂口後短暫徘徊，再連跌幾日。昨日最低見24766點，剛剛大約就係後抽頸線位置。玩完，定還是準備升第二轉，接下來幾日應該會有明顯趨勢。上證指數今輪大成交爆升的
低位為3187點，上星期五略跌穿，昨日就畫畀你睇企穩再升，當然係想傳達未玩完的訊息畀市場。下跌時成交量持續收縮利好，穩陣就睇多幾日。
另一邊廂的美國，7月尾有轉折位。早前推出的緊急經濟援助措施，部份本月底到期或達到上限。美國國會自70年代開始逢8至9月都休會，所以有冇新刺激經濟措施就係這兩個星期內決定。照現時情況好難唔推新刺激經濟措施，所以綜合來看，股市今浪未玩完機會較大，但最多兩三個月就要割韭菜。
「港版國安法」實施後，中美暫時仍以嘴炮為主。不過其中一條有關美國制裁的消息看似平淡，其實殺傷力相當高。據《紐約時報》報道，特朗普正考慮緊宣佈全面禁止中共黨員及其家屬去美國旅行，在美國的中共黨員及其家屬亦可能被驅逐出境，解放軍同國企高層去美國申請簽證也會受限。
禁中共黨員赴美影響大
搞得禁止赴美旅行就會有下一步，當然讓人聯想起麥卡錫主義。這招最大的殺傷力，係封咗中共黨員後路。中美貿易戰期間彭斯發表演說，話美國誤判中國富起來後，冇出現西方國家應有的改革。資本主義及民主制度係同一個系統內的兩套秩序，當人有錢後，自然會對身家財產保障有要求。君主、封建、獨裁、威權，點保障個人？從西方國家經驗，人民的訴求會推動國家改革。但彭斯話美國計錯數。
中國人有錢後選擇移民，用錢去買入西方先進國家用血換來的現成民主保障制度。革命？去你的，大爺老婆澳洲籍，兒女美國英國上學入籍，曼克頓、倫敦、溫哥華買房，高盛、大摩、美銀爭相給老子開戶，革你媽的命，腦袋進水嗎？特朗普上述方案倘若成真，中國移民模式將被終結。
乍聽之下，禁足中共黨員赴美旅行好似冇料到，諗深一層就唔係。好多重要的事項要本人親自處理，文件要親自簽署，有律師見證都唔夠。更重要係，美國搞得，意味五眼聯盟遲早都會跟，原本諗住退休去外國點搞？所以現時只係傳聞，未有確實官方消息。一旦落實，是一顆深水炸彈。
Mr. Tregunter
本欄逢周二刊出
大棋局 - Mr. Tregunter 舊文
來源 source: http://s.nextmedia.com