【大棋局】貨幣秩序時代革命（Mr. Tregunter）
8月27日聯儲局主席鮑威爾宣佈，對貨幣政策執行框架作重大調整
8月27日聯儲局主席鮑威爾宣佈，對貨幣政策執行框架作重大調整，將過去的「通脹目標」改為「平均通脹目標」。這次為大動作改變，聯儲局過去30年做法，係
設定一個通脹目標並盯住，當通脹升到目標附近就會提前加息。因為通脹容易如脫韁野馬拉都拉唔住，提前加息屬防禦性質，控制通脹於目標附近。
現改為平均通脹目標，意味通脹高過目標可仍然唔加息，繼續由佢升。聯儲局並無公佈平均通脹目標計算公式，即係睇餸食飯，到時一路觀察一路決定是否加息。這個改變透露的最重要訊息，係聯儲局自己心中冇底，一旦通脹升溫亦唔知可維持幾耐，害怕提前加息又打殘通脹，寧願由佢升多陣。
所以今次變動，係象徵時代正式交替，過去30年美國最驚通脹，因經歷過Paul Walker要將聯邦基金利率升到20%先可將通脹壓落去的80年代；現在最驚通縮，驚嘅程度係連區區2%通脹都不知能否維持。殺頭生意有人做，賠錢生意冇人做，利率即反映市場有冇肉食的指標。市場畀唔起利息，甚至要負利率，就係大家都冇肉食。
另一邊廂，緊接著的8月28日英國央行鬆口，話央行可使用的工具包括負利率。8月初英國央行貨幣政策會議後，央行行長Andrew Bailey表示冇計劃用負利率。最近市場預期英國2021年可能就實行負利率，故傳媒經常追住英國央行問，今次係官方首次以非否定負利率的姿態回應。
美國貨幣政策發展至今，相當大程度仍依據菲利普曲線，簡單地講就係高通脹失業率會低，低通脹失業率會高。但金融海嘯後以qe為首的各種貨幣政策工具幹預市場，令菲利普曲線越來越平坦，已僵化難判斷情勢。在通脹與失業率負關係變得不太明確下，二者取其一，聯儲局先顧掂失業率。
然而今天亦與30年代不同，當時金本位，限制了央行印銀紙，通縮如黑洞將周遭吞噬。現時一有咩依鬱就量化寬鬆，甚至負利率，連數字貨幣都玩埋。過去每次引發市場崩潰的流動性危機被大大削弱，伴隨而來係市場越來越似殭屍。所以今天不會簡單地重複大蕭條教訓，但逃避大蕭條所作出的各種手段會推向大蕭條的結局。
毫無疑問2020年註定係一個分水嶺年份，大至國家貨幣政策小至個人理財方式，不久將來回望可能方發現昔日所學盡已過期。貨幣秩序的時代革命亦將到來。
Mr. Tregunter
investMAN
For People of Style & Substance
掌握理財智慧 感受生活品味
http://investMAN.hk
-----------------------------
【全球樓行】 Dream House零距離
屬於香港人的移民攻略
-----------------------------
《蘋果》英文版免費試睇：了解更多
英文版已登錄《蘋果》App，立即下載/ 更新：iOS / Android
-----------------------------
《本土情味》結集《飲食男女》雜誌經典欄目「老字號」文章，記錄香港40家飲食老店的動人故事，見證香港飲食史的甜酸苦辣。即日起，於各大便利店及書報攤有售，並於 《蘋果日報》你的優惠 網上獨家發售！
大棋局 - Mr. Tregunter 舊文
來源 source: http://hk.news.appledaily.com