操盤手劄記｜凜冬已至 趨吉避凶（割柑人）
螞蟻集團實際控制人馬雲
權力遊戲之下，凜冬兩個月前已至！講緊科網股。2020年11月2日，中國當局發佈網絡貸款管理新規；3日，螞蟻上市突被煞停；10日，當局發佈平台經濟反壟斷指南；12月14日，阿里（9988）、閱文（772）等涉收購違反反壟
斷法被罰款；24日，阿里涉「二選一」壟斷被調查。
嚟到2021年，根據中央經濟工作會議所列今年八大任務，包括「強化反壟斷和防止資本無序擴張」。此前五中全會拍板嘅「十四五」規劃，已提「加強反壟斷和反不正當競爭執法司法」，可見反壟斷唔止係今年，更係未來5年任務。按反壟斷法，違者可罰10%年度收入，好揦脷。
反壟斷之風，不獨中國颳起，歐美亦然。美國正對Google、Facebook提出多宗反壟斷訴訟；歐盟亦對Amazon提出反壟斷指控。喺歐美，科網巨頭可打官司；但喺中國，科網巨頭紛紛低頭，只以「積極整改」回應。喺歐美，多數罰款了事；但喺中國，以螞蟻事件嚟睇，走唔甩要拆骨。
喺電商同外賣行業，以GMV睇，阿里喺前者市佔率逾60%，美團（3690）喺後者市佔率亦逾60%。阿里、美團呢類平台老大，現時宜避開；一直投訴受到阿里天貓「二選一」競爭優勢打壓嘅京東（9618），反而有機受惠。京東仲有兩大賣點，其一具有染藍槪念，其二分拆京東物流上市，據講已揀美銀、高盛籌辦IPO。不過，宜候回吐分注吸納，始終科網股仍喺刀口上。
港股喺2021年首個交易日紅盤高收0.9%，報27,472。新經濟股仍受注目，SaaS（軟件即服務）股爆升，當中，為房地產商提供SaaS產品嘅明源雲（909），上年9月25日上市，截至年底，一季升幅已跑贏ATM一年升幅，不妨留意。
-----------------------------
掌握理財智慧 感受生活品味
investMAN全新網頁 優雅登場
-----------------------------
部署退休 輕鬆達至財務自由
點擊即睇《退休理財天書》
-----------------------------
【全球樓行】 Dream House零距離
屬於香港人的移民攻略
-----------------------------
支持蘋果深度報道，深入社區，踢爆權貴，即Like蘋果專題及調查組FB專頁！
操盤手札記 - 割柑人 舊文
來源 source: http://hk.news.appledaily.com