笑到最後｜地產霸權有乜問題？（高明）
笑到最後｜地產霸權有乜問題？（高明）
放眼全世界，市中心樓價一定係貴，
香港自從偏遠地區呎價突破1萬蚊之後，已經可以斷言成個香港都係市中心。
最近香港又掀起地產霸權嘅討論，如果只係將目光放喺香港，無可能得出完整嘅結論，放眼全世界，市中心樓價一定係貴，香港自從偏遠地區呎價突破1萬蚊之後，已經可以斷言成個香港都係市中心。
下載Yahoo財經APP
美股、外匯、加密貨幣免費即時報價，自選投資組合獲取相關新聞提示。
咁究竟地產霸權有乜問題？近兩年高明完全放棄港股，去美股市場做二等股民，終於感受到香港地產霸權嘅問題。
多元霸權 投資者天堂
由於呢度係投資專欄，首先要將對霸權控訴嘅感性放低，然後亦要將霸權對社會經濟好壞嘅理性都放埋一邊，只係睇數字，即係價格嘅升跌，霸權根本冇問題，單一霸權就係問題，如果係多元霸權，對投資者嚟講係天堂，即係美股市場。
講壟斷，美股市場更霸權，FAANGMT對人類生活嘅影響遠超想像。早排出現全球社交媒體移民潮，短時間好似出現走佬，長期嚟講，Facebook（FB）之後股價破頂，廣告收入大升，基本上要脫離好難。
但係社交媒體始終係娛樂，要離場始終可以離場，高明有朋友刪除咗facebook，亦有朋友幾年冇更新過。但係有一啲嘢一致共識戒唔甩，就係Google（GOOGL）嘅服務，由搜尋器、電郵、到儲存空間、到YouTube等等，任何唔用Google產品嘅行動，最終都只能夠淪為口號，佢嘅股價亦解釋咗佢嘅霸權能力。
另一方面，有啲嘢其實你用咗並唔知道，例如上邊其中一隻Netflix（NFLX），佢嘅成功，建基於背後亞馬遜（AMZN）雲端AWS服務。雲端業務就係整個互聯網嘅上遊，亞馬遜、微軟（MSFT），以及開始成熟嘅Google已經係霸權級，只要你上網，其實你用咗都未必知。
不過，美股有咁強勁嘅科技霸權，唔代表其他產品及企業會淹沒，事實上，唔同嘅實體及非實體股票都非常蓬勃，傳統經濟霸權股，今年由銀行、發展商、零售、服裝、鞋、飲食、石油、醫藥等等，從頭到尾都炒過一轉。科技股霸權無疑強勁，但美股世界好大，其他霸權一樣有得炒。
地產霸權嘅問題係太單一，港股除咗地產股之外，真正放得上枱面嘅好有限，大家可能會話，仲有中概股，但選擇仍然係少，部份世上當旺嘅概念，例如先進制程晶片，又或者AI自動駕駛，甚至訂閱制嘅各項股份，港股選擇空間都不外乎ATMXJ，出咗呢個圈可能有上述概念，但已經唔算霸權。唔好話做一個基金買港股，散戶買股都有如足球國家隊教練揀人，正選僅僅齊腳，後備實力太弱；相反，美股數到C隊，可能都仲會見到Shopify（SHOP）、AMD（AMD）、Costco（COST）、Mastercard（MA）等等舊霸權或準霸權。
股價升就係好企業
社會嘅一流人才係進行破壞性創造嘅企業家，例如喬布斯或Elon Musk；二流人才就係幫佢哋打工賺期權嘅高級打工仔甚至合夥人；三流人材就好似你同我炒股票，奉行「若不能打到他，參與他」的方法，買佢嘅股票。當然，一二流人才只係社會嘅極少數，大多數生活富裕但冇太大成就嘅人都係第三類，Google識喇掛？年頭買咗現時已經升62.29%。
香港只有地產霸權嘅問題就係大多數人無法參與霸權，更加唔好講本地地產股股價並冇好似科技霸權股咁長升長有。股價，就係Marketing，一隻股票升，大家就會鍾意佢，讓地產股飛，就可以建立支持者。FAANGMT係咪好企業？股價升，就係好企業，就係良心企業。
高明
facebook：https://www.facebook.com/bigricetea
IG：https://www.instagram.com/koming.usstocks/
作者簡介︰賺錢係目標，炒股係手段，專欄記載由手段到目標嘅過程。
本欄逢周三刊出
笑到最後 - 高明 舊文
本文作轉載及備份之用 來源 source: http://hk.finance.yahoo.com