操盤手劄記│能源荒尋值博股（割柑人）
操盤手劄記│能源荒尋值博股（割柑人）
冬季取暖、經濟重啟，大幅增加民生同工商業用電需求，引致石油、天然氣、煤炭價格急升。
上周五踏入10月兼第四季，中港股市國慶休市。外圍開局，亞洲得個「跌」字，台、韓、日、星、澳股市分別跌2.2%、1.6%、2
.3%、1.2%、1.9%；歐美方面，泛歐STOXX 600指數跌0.4%，美股道指、標指、納指則分別升1.4%、1.1%、0.8%。A50期貨跌1.1%，港股ADR比例指數亦低水0.6%。港股本周開市，開大定開細？睇圖恒指出現「三底背馳」同「雙頂」好淡兩種形態，波幅逐漸收窄，喺頸線附近徘徊，本周有機爆邊，若有做開期權，可開Long Call、Long Put。
下載Yahoo財經APP
美股、外匯、加密貨幣免費即時報價，自選投資組合獲取相關新聞提示。
10月係傳統股災月，最經典嘅係美股喺1929年、1987年嘅10月，分別出現兩日暴跌23%、單日暴跌22.6%。至於港股，亦喺1987年、1997年、2008年、2018年嘅10月，分別錄得當月暴跌44%、29%、22%、10%。現時環球面對能源危機、通脹升溫，加上美國債務上限危機未除、中國監管風險亦未除，要提防10月股災魔咒應驗。外媒引述期權市場交易數據指出，有大戶看淡美股未來一季走勢，利用Collar期權策略（正股+OTM Short Call+OTM Long Put）保護倉位，預期標指年底前可能下跌20%，涉及期權倉位的金額達到9,400萬美元。
美國遇上雙魔咒
話時話，除咗股災魔咒，美國仲有總統魔咒Curse of Tippecanoe。傳說1841年當上總統嘅哈里遜，被印第安酋長Tippecanoe之弟詛咒，每隔20年當上總統者都會喺任內逝世，哈里遜就任一個月後病逝，此後，1861年當總統嘅林肯遇刺身亡、1881年嘅加菲爾遇刺身亡、1901嘅麥堅利遇刺身亡、1921年嘅哈定任內病逝、1941年嘅小羅斯福任內病逝、1961年嘅甘迺迪遇刺身亡、1981年嘅列根遇刺但無死，2001年嘅小布殊遇暗殺未遂，似乎80年代起魔咒變為有驚無險，2021年嘅拜登又會點呢？
講返能源危機，冬季取暖、經濟重啟，大幅增加民生同工商業用電需求，引致石油、天然氣、煤炭價格急升。歐洲庫存低企、俄羅斯以至尼日利亞供應限制，更引發天然氣價格戰；各國為求減少碳排放，爭相採購天然氣，令情況更嚴峻。歐洲、亞洲天然氣上月漲價四、五成，美國漲價三成半，升幅相對溫和，因出口受到限制，但作為世界第三大天然氣出口國，產量下降顯著影響歐洲、亞洲供應。
氣價升帶旺油股
天然氣價格急升，促使石油成為價格相對較低嘅發電燃料，帶動需求。寶盛指出，部分發電廠喺天然氣加價時，會以石油作為替代燃料，導致油價上升。高盛預期，石油供不應求加劇，並將布蘭特油價年底預測由每桶80美元上調至90美元。市場睇好原油需求，不妨留意中海油（883）、中海油田服務（2883），兩者的股價走勢都呈杯柄突破。
值得注意嘅係，能源價格上漲產生連鎖效應。能源漲價亦會影響化肥供應，而化肥係重要農業生產原料，換言之，能源漲價亦會牽動大宗商品同糧食價格回升。能源短缺，通脹加劇，而通脹正係各國中央銀行嘅罩門，勢必出手遏制，收緊貨幣政策，到時恐怕成為全球股市資產泡沫爆破嘅導火線。
割柑人
曾任財經記者、編輯，在本港報章撰寫財經專欄逾十年
www.fb.com/hkstockpicker
本欄逢周一刊出
操盤手札記 - 割柑人 舊文
本文作轉載及備份之用 來源 source: http://hk.finance.yahoo.com