操盤手劄記│日股與中槪股藤掕瓜（割柑人）
操盤手劄記│日股與中槪股藤掕瓜（割柑人）
上星期阿里反彈帶動港股升逾600點之際，日股亦升逾500點，原來都同阿里有關！
上周Yahoo同Google公布香港年度搜尋榜，前者十大熱搜港股中，三甲依次為騰訊（700）、滙豐（005）、阿里巴
巴（9988），當中兩隻係科網股，連同第十位嘅小米（1810），共有三隻；後者十大熱搜財經話題中，四隻港股上榜，分別為快手（1024）、諾輝健康（6606）、醫渡科技（2158）、小米，亦有兩隻科網股。喺中國監管風暴下，今年科網股如坐過山車，以科指計，今年高低位相差近五成；阿里巴巴更加如坐海盜船，今年高低位相差近六成。
美股、外匯、加密貨幣免費即時報價，自選投資組合獲取相關新聞提示。
阿里近期以落地獄之勢連番破底，上周一喺中美監管夾擊、中槪股面臨除牌風險下，跌破被視為「鐵底」嘅111元（既係阿里港股下降軌底部，亦係阿里美股2017年5月低位），低見109.5元；但翌日旋即以破地獄之勢反彈12%，創上市以嚟最大單日升幅。大上大落，心血少啲都嚇親！當日，阿里反彈帶動港股升逾600點之際，日股亦升逾500點，原來都同阿里有關！
軟銀鍾情中概科網股
關咩事？關一男子事！就係日本電訊商軟銀（日：9984）創辦人孫正義！話說佢係中概科網股「粉絲」，據佢講，2000年首次見到阿里創辦人馬雲時，同佢傾咗5分鐘，無睇數據、簡報，就決定投資落去。最初投資2,000萬美元，之後追加4,000萬同6,000萬美元，到2014年阿里赴美上市時，軟銀持股價值翻了2,900倍。軟銀係阿里大股東，曾經持股近34%，現時持股近25%；而且阿里係軟銀持有市值最大嘅投資，佔其總資產值近四成。與此同時，軟銀又係日經指數第三大重磅股，佔比4.58%。阿里升跌會牽動軟銀，從而牽動日經。
除咗阿里，軟銀亦睇中唔少中國初創，包括喺滴滴出行（美：DIDI）上市前大手投資，持有發行股本21.5%，成為大股東；其他中國投資仲有貝殼找房（美：BEKE）、字節跳動、餓了麼、作業幫等。中國監管風暴未了，軟銀作為風眼中嘅阿里、滴滴嘅大股東，加上所持其他中槪股，自身股價難免同中槪股連成命運共同體，藤掕瓜之下，日股對中概股嘅敏感度上升，隨時拍住港股。
最重要睇政治同政策
現時投資中概股，最重要係睇政治、睇政策，基本因素如盈利、派息、資產淨值、現金流等，相對變得次要。中共中央政治局上周召開會議，分析研究明年經濟工作。會議首次提及兩個「良性循環」：①實現科技、產業、金融良性循環；②促進房地產業健康發展和良性循環。中央政策方向，可作投資啟示。
中央之前只講「金融支持實體經濟」，現時進一步定調，即金融支持科技創新，科技創新帶來產業升級，產業升級又反過來支持金融發展，三者形成良性循環。估計將會有金融支持科技創新嘅政策跟尾，不妨留意科創板50 ETF（3109）同中創業板ETF（3147），可趁回調收集，作中長線部署。
割柑人
曾任財經記者、編輯，在本港報章撰寫財經專欄逾十年
www.fb.com/hkstockpicker
本欄逢周一刊出
操盤手札記 - 割柑人 舊文
本文作轉載及備份之用 來源 source: http://hk.finance.yahoo.com