笑到最後｜美版供平過租（高明）
笑到最後｜美版供平過租（高明）
美國樓市嘅樓價領先租金18個月，現時已經接近租金嘅爆炸期，下一步相信係加租到貴過供樓。
「北美大把地，鬼佬冇人買樓。」
「白人世界啲樓唔升、買咗沽唔出預坐一世、死貨嚟千祈唔好買。」
美股、外匯、加密貨幣免費即時報價，自選投
資組合獲取相關新聞提示。
最近香港出現移居/搬屋潮，類似三十年前「秋天的童話」唐人街阿伯教訓後人嘅經驗之談，又間中喺WhatsApp之類傳嚟傳去，不過，老調重彈已經冇意思，因為已經如常生活嘅正常國家，樓價指數已經升到爆標，上述嘅老華僑隨時自己咁多年買埋買埋幾廿間收租，出口術影響其他人買賣決定。
正如呢度所講，香港樓市行先美國樓市十年，97年香港金融風暴樓市爆煲，2008年美國次按風暴金融海嘯。2009年QE導致香港樓市長升超過15年，到今日美國樓大升，有咩原因，可能係冇，只係咁啱有咁嘅趨勢。
今次升市有別於以往，就係出現去中心化，美國樓市升得最勁嘅美方係佛羅里達州邁亞美，因為天氣以及政治，冇乜抗疫管制而喺疫情之後聞名美國。邁阿美、奧蘭多、奧斯汀等地方樓價升兩成，反而紐約樓價升14%，因為住邊，同喺邊度做嘢，個關係冇以前咁重要。
下一步，參考香港樓市，就係供平過租，3月美國兩房租金按年增長17%至1,807美元，連續8個月增長；美國50大城市今年1月樓價中位數為30萬美元（大約234萬港元），按年升9.5%，假設業主畀5%首期，計及按揭供款、 保險、交稅、其他雜費等等，每個月使費大約1,895美元，已經係供樓同租樓冇分別，分別係10年後供樓嘅有層樓住，租樓嘅繼續租緊。
美國樓市嘅樓價領先租金18個月，現時已經接近租金嘅爆炸期，下一步相信係加租到貴過供樓，然後樓市再升，住宅樓價升到收益率縮窄，若幹年後會再向用途更窄嘅物業炒，不過唔知美國有冇得炒劏房、停車位、劏舖、死場、工廈等等。
唔使框死自己買港樓
放眼世界，其實好大，香港好多人鍾意買樓，其實唔一定框死自己買港樓，當然，海外買樓收租有成為稅務居民嘅考慮，但配合近期香港嘅「搬居潮」，睇報導話只係經今次渠道離開嘅人會失業貧病交逼居無定所山窮水盡，難得搬屋，咪順便買間樓住嚇，十年過後，拎返今日嘅「搬屋專題報導」一睇，可能都會有「窮得只剩下樓」嘅感嘆。
反正歷史趨勢慢香港十年、樓價起步位接近（兩百零萬港紙）、爆升前有大危機及大QE，種種跡象顯示，美國為首西方世界重蹈港樓爆升10年機會極高。
最後，有論調指近期離境嘅人都只係移居或者搬屋，呢個睇法實在太切合Web 3經濟，太多嘅工序已經毋須返辦公室做，住邊個國家根本冇分別，一旦過一兩年後，元宇宙佔你一日生活3至5小時的話，住喺美國、香港定盧旺達，最大分別將會係寬頻速度。
高明
facebook：https://www.facebook.com/bigricetea
IG：https://www.instagram.com/koming.usstocks/
作者簡介︰賺錢係目標，炒股係手段，專欄記載由手段到目標嘅過程。
本欄逢周三刊出
笑到最後 - 高明 舊文
本文作轉載及備份之用 來源 source: http://hk.finance.yahoo.com