【平民投資教室】錢俊：從英國牛油賣幾錢 教你分析投資表現
平民投資教室
日期：2022-07-12
更新時間：08:54:49
原油價格高企外,網民亦熱烈關注牛油價格。有香港媒體以英國一磚牛油要90蚊港紙為標題,暗指英國物價高企。事實係嗰磚牛油重量為1kg,喺香港呢個價錢只買到一半份
量。只要你問嚇剛剛移居當地嘅朋友就知道,超市大部份物價都平過香港一截。標題黨唔單止喺媒體報道上出現,投資公司賣廣告時都累見不鮮。市面上會見到有基金標榜自己派息高達6至8厘。細睇之下,隨咗好細隻字寫住派息並非保證之餘,更加有「割肉」條款在細節,容許拎你啲本金出嚟派返息俾你。
另外就係基金表現。好多聲稱過去五年十年投資翻到一兩倍,又大幅跑嬴指數等等。但睇返好多基金過去一年或三年表現,原來係蝕錢兼差過指數。投資公司經常會搵個對自己有利嘅時間點開始計算,去sell自己嘅投資表現,但好多時投資沒有長勝將軍,尤其經歷過去一年股市波動,好多基金呢段時間都落後大市。
要揀好嘅投資產品,唔好淨係睇廣告,宜自己做多啲功課,以免跌入標題黨陷阱。比如投資基金,可以上網比較嚇過去幾年及每一年嘅表現,睇嚇係咪好多時都跑嬴指數。如果只係某一兩年嬴好多,之後好多時間都係輸曬嘅話,即係基金經理嗰期嬴可能只係好彩。如果係諗住長線投資,應該計嚇數,表現及股息加埋嘅總回報,平均每年有幾多,而唔係一味追求股息。
3069/2820:生物科技表現似食咗藥
近期中港醫藥板塊成為其中一個反彈市嘅領頭羊。短線原因不外乎中國疫情受控,包括醫藥公司在內嘅復工復產進展順利。另外都有多項政策上嘅支持。再者,上年該板牌有跌過龍之勢,以恒生香港上市生物科技指數為例,過去12個月跌咗44%,因此出現復甦反彈唔奇。而長線嚟睇,中國老齡化問題加劇,有指2025年中國60歲以上人口將超過19%。國家十四五規劃及「中國製造2025」產業戰略中,生物技術亦被列為關鍵發展領域之一。因此醫療可謂其中一個有前景嘅板塊。
醫藥股反彈帶起華夏恒生香港生物科技指數ETF(HKG:3069)及Global X 中國生物科技ETF(HKG:2820)兩隻基金嘅表現。兩者過去一個月表現進佔香港上市ETF三甲,齊升約13%。若要比較兩隻基金分別,前者只投資香港上市嘅股票,十大持股包括藥明生物、阿里健康、石藥集團三隻藍籌股;後者則包括埋A股及美股市場上市嘅中國生物科技公司,例如國內上市嘅恒瑞醫藥、美國上市嘅和黃中國醫藥科技等。
雖然投資嘅公司同成份略有不同,但畢竟都係中國醫藥,只係唔同牌子嘅「牛油」,實際上分別唔大。年初至今表現雖然3069比2820跌幅較小,但前者過去12個月嚟計較為遜色。若果唔想買曬港股,可以選擇2820。而3069喺管理費方面則較有優勢,比2820平0.18%。
想聽其他投資Topic?話我知:chinjun.column@gmail.com
FB: chinjun.etf
IG: chinjun.column
以上觀點僅為個人分析,並不構成任何投資建議。
平民投資教室 - 錢俊 舊文
本文作轉載及備份之用 來源 source: http://hksmedia.com