操盤手劄記│5中企被祭旗 中美戰鼓再響（割柑人）
操盤手劄記│5中企被祭旗 中美戰鼓再響（割柑人）
美國聯邦通訊委員會（FCC）下令禁止入口或銷售具有「不可接受的國家安全風險」嘅通訊設備，點名華為、中興等5間中國企業。
本月中，中美元首喺出席印尼峇里島G20峰會時會晤，係拜登上任
近兩年嚟，同習近平首次面對面會晤，呢次面談成事，意味雙方都認為彼此面臨嚟自地緣衝突同經濟逆風嘅挑戰，傾談3小時12分鐘後，雙方承諾努力修補關係。言猶在耳，上周五，美國聯邦通訊委員會（FCC）下令禁止入口或銷售具有「不可接受的國家安全風險」嘅通訊設備，點名華為、中興等5間中國企業。
美股外幣即時報價 多國新聞任睇
華為、中興原本就被FCC列喺威脅名單，今次嘅禁令係進一步禁止呢兩間公司嘅設備未來獲得許可。除咗通訊設備商華為、中興，另外，監控設備商海康威視、大華科技，無線電設備商海能達，今次亦被點名。海康、大華嘅設備正被政府機構廣泛使用，海能達嘅設備亦正被警察廣泛使用。由於擔心中國透過影音共享App攞到美國用戶數據，FCC官員近日亦呼籲限制TikTok喺美國營運。
降準預早放風 效應或已反映
華盛頓智庫American Enterprise Institute評論認為，拜登政府延續特朗普執政時期嘅政策，繼續向中國企業施壓，剛頒布嘅禁令係「一個高潮」。中國外交部曾經表示，中方堅決反對美方泛化國家安全概念，濫用出口管制措施打壓中方企業。至於市場反應，上周五係感恩節翌日，美股半日市，道指升0.45%、標指跌0.03%、納指跌0.52%，中槪股反應較大，金龍中國指數跌3.28%，港股ADR比例指數低水94點或0.54%。
睇返港股，恒指上周五收17573，跌0.49%，全周跌2.33%，喺17300至17700嘅400點內整固，更連續3日成交不足千億，屬大漲後小回，橫行待變格局，上方阻力為前周高位18400水平，下方支持為11月11日上升裂口16800水平。上周五收市後，人行宣布12月5日降準0.25個百分點，降準可增加市場流動性，對中資金融股有利，但此前國務院常務會議已作預告，市場已作預期，相信部份降準效應已反映。
內銀盈利表現 建行跑贏同業
今次降準，可釋放長期資金約5,000億元人民幣。對金融機構嚟講，可降低資金成本每年約56億元人民幣，而通過金融機構傳導，可降低實體經濟融資成本。據中金預測，降準0.25個百分點，內銀2023年淨息差可增加0.4點子，淨利潤可增加0.3%；該行又預計，內地陸續推出措施配合，引導內銀將資金投放於中小微企業、基建、製造、內房等重點支持領域，11月至12月嘅信貸料將增加。
四大內銀中，建行（939）盈利表現好過工行（1398）、中行（3988）、農行（1288）。今年首三季，建工中農淨利潤分別增加6.5%、5.6%、5.9%、5.8%；據彭博綜合券商預測，今年淨利潤分別為增加5%、增加3%、減少6%、無增長，明年淨利潤則分別增加6%、5%、7%、7%。建行上周連日上升，現價4.7元，股息率8.8厘，預測明年股息率達9.3厘。該股呈杯柄突破，可候回至10天線4.6元左右吸納，目標5.5元，止蝕4.1元。
割柑人
曾任財經記者、編輯，在本港報章撰寫財經專欄逾十年
www.fb.com/hkstockpicker
本欄逢周一刊出
操盤手札記 - 割柑人 舊文
本文作轉載及備份之用 來源 source: http://hk.finance.yahoo.com