笑到最後｜飯局及肥媽輸5000萬（高明）
笑到最後｜飯局及肥媽輸5000萬（高明）
非正式統計，好多金融嘅事件，都係喺餐廳發生。
最近讀到蔡瀾前輩嘅一篇文，講述香港飲食界嘅貧富懸殊，高級餐廳人均消費5000蚊等閒甚至唔夠，另一端則係化妝大牌檔茶餐廳冰室30至40蚊一餐午餐。
美股外幣
即時報價 多國新聞任睇
內文都有解釋點解餐廳越開越高級同貴，因為畀錢嘅係上市公司，使其他人嘅錢，梗係食豪啲。或者係香港金融獨大嘅本質，先需要咁多飲飲食食，本身金融就係冇嘢，大部份行為都係軟件系列嘅知識、法律、關係，拎部電腦喺中環做同沙頭角做，件事冇分別，但因為本身冇嘢，都要充少少行頭，市中心辦公室、見客去食靚餐，都好合理。
金融事件多在餐廳發生
非正式統計，好多金融嘅事件，都係喺餐廳發生，例如莊家傾刁傾向去茶餐廳大家樂（341）之類，因為其他食客唔係行家，聽唔明；又例如代理人搵下線駁腳，特登去酒店餐廳扮撞到，簡短傾談交帶工作唔留底。簡單如飯局、金融峰會，都離唔開口腔期。
例如最近肥媽演唱會前自稱輸5000萬股票，嚟自一隻電燈股，訪問自稱全世界有物業供滿，應該對生活都冇乜影響，亦有傳媒指係代言費以股代現金，所以只係白做同升嘅時候紙上發財，其實從冇拎過錢出嚟。
有一段時間，只要去上環富聲，中午一號房長期係「李生」，就係德普科技李永生。沖好茶望一望，食客魚貫入坐，肥媽最易認，然後幾個估計係董事「傍友」之類，最後李生終於到場。
類似嘅飯局，應該喺唔同嘅酒樓都一路上演，用上市公司錢請友好食飯，都可以幻想到飯局嘅設計對白：「我有睇你個節目呀，嘩，好精采呀，煮飯都可以拍到咁好睇，全香港得你一個做到。」
「大家畀面。喂！你隻燈膽升咗幾個價位架喎！你唔通知我嘅？ 」
「係咩？我唔知喎！我自己都唔知！我發誓自己都唔知！傾返生意先，我有件嘢，諗住借助你嘅大名睇嚇大家有冇得合作。」
「代言？」
「冇錯，仲批埋股畀你，啱啱又升兩毫喇，你都入啲吖，有錢齊齊搵。」
高明
facebook：https://www.facebook.com/bigricetea
IG：https://www.instagram.com/koming.usstocks/
作者簡介︰賺錢係目標，炒股係手段，專欄記載由手段到目標嘅過程。
本欄逢周三刊出
笑到最後 - 高明 舊文
本文作轉載及備份之用 來源 source: http://hk.finance.yahoo.com