【平民投資教室】錢俊：今年或跑嬴大市的板塊
平民投資教室
日期：2023-02-07
更新時間：10:13:58
市場反彈，投資者開心之餘，亦積極部署入市。想跑嬴大市，但又唔想揀股，透過買行業相關ETF以分散單一公司風險都係一個選擇。
傳統板塊方面，港銀較為有優勢。受惠通關帶嚟經濟復甦
，各行各業都積極拓展業務，加上樓市交投回勇，借貸業務應該不俗，此外息口高企亦有利銀行利息收入。從近期滙控重拾雄風可見一班。另外中港消費股亦受惠因疫後經濟復甦帶嚟嘅報復式消費，理應喺嚟緊下月全年業績出爐時會見到更多反彈跡象。
新經濟股方面，科網股應該跑嬴硬件股。除咗內地經濟復甦帶旺電商業務，近期風向似乎都顯示過去兩年對科網股嘅監管風暴漸漸落幕，例如不時傳出螞蟻金服準備今年內重啟上市計劃，馬雲多次公開露面及被傳放棄對阿里巴巴唔少業務嘅控制權等。空穴來風，未必無因，正正希望以科網巨企嘅能力帶動經濟復常。
但硬件股例如電動車及半導體股等則存在較大風險。中國與以美國為首嘅西方集團喺高科技領域上鬥得如火如荼，由其半導體業，不時限制出口芯片及技術。由於唔少機械設備要成功出貨，芯片嘅需求殷切，並且供應鏈一環扣一環，各國互毆最終產業鏈上下遊都受到影響。上周蘋果公司公佈業績已顯示收入跌幅創六年嚟最大，主因喺供應量大幅減少，而非需求疲弱。
與其揀選一個行業，不如揀多幾個南轅北轍嘅行業，即係喺傳統同新經濟股都各有涉獵，有助分散單一行業風險。現時唔少ETF一手買入價隨時少於一千蚊，自由調配加減倉其實唔難。
3030：新興市場科網股
之前錢俊介紹過唔少香港上市嘅科技股ETF。今次介紹惠理EMQQ新興市場網絡與電商ETF（HKG:3030）。基金喺2022年7月上市，追蹤網絡與電商相關股份嘅指數，入面包括網上零售、搜索引擎、社交網絡、網上影片、電子支付、網上遊戲及網上旅遊等，持股數目超過一百隻，但一手只需約1600蚊。
基金投資嘅公司主要業務都喺新興市場。地區分佈上，超過一半成份股為中資股，印度及南韓各佔約9%，除騰訊、阿里巴巴、美團、京東外，仲包括印度信實工業、荷蘭上市互聯網集團Prosus等。
投資新興市場固然為憧憬行業增長空間，但市場之所以叫「新興」，因為未「成熟」。畢竟呢啲市場可能嘅行業制度未夠完善，又或者金融市場交投量少，價格容易被寡頭大戶操控。喺香港投資者熟悉嘅國內科網監管風暴落幕之際，近期嘅全球投資市場大事就係印度巨企阿達尼集團（Adani）被外資投資研究機構指控其人為操控股價，導致集團入面七間上市公司嘅市值共下跌約30%。因此，投資組合宜以成熟市場為主軸，新興市場則小賭怡情。
想聽其他投資Topic？話我知：chinjun.column@gmail.com
FB: chinjun.etf
IG: chinjun.column
以上觀點僅為個人分析，並不構成任何投資建議。
平民投資教室 - 錢俊 舊文
本文作轉載及備份之用 來源 source: http://hksmedia.com