近排最hit嘅投資主題，莫過於人工智能（AI）應用。
加息最終章？美國公布3月CPI數據前夕，隔晚美股窄幅上落，觀望氣氛濃厚，昨日港股反覆偏軟，喺騰訊（700）大股東Naspers旗下Prosus再將騰訊股票轉倉CCASS部署減持下，大市受拖累，跌175點或0.9%，收20309。
恒指連續兩日喺50天線爭持，3月以嚟更四度觸及此線無功而還，50天線成阻力位。市場對美國通脹數據心裏有底，上周出爐嘅經濟數據已知大槪，聯儲局5月加息可能會係終章。
美股外幣即時報價 多國新聞任睇
美國上周出爐嘅經濟數據，包括3月ISM製造業PMI跌至2020年5月以嚟新低、2月JOLTS職位空缺連續兩個月回落、4月1日當周初領失業救濟人數高過預期、3月非農新增就業人數連續兩個月放緩。本周焦點，除咗通脹數據，仲有今日淩晨公布嘅儲局會議紀錄。利率期貨顯示，儲局5月加息0.25厘機會逾七成；與儲局會議日期掛鈎嘅互換合約價格，更預示5月加息0.25厘機會逾八成。
中國擬規管生成式AI
近排最hit嘅投資主題，莫過於人工智能（AI）應用，包括掀起熱潮嘅chatbot——OpenAI嘅ChatGPT，以致中國版ChatGPT——百度（9888）嘅「文心一言」（Ernie Bot）、商湯（020）嘅「商量」（SenseChat）、阿里巴巴（9988）嘅「通義千問」（Tongyi Qianwen）。不過，就喺前日阿里雲峰會「通義千問」登場幾小時後，中國網信辦就發布《生成式人工智能服務管理辦法（徵求意見稿）》，指其「具有輿論屬性或社會動員能力」。
內地官媒《經濟日報》周一發文《熱捧人工智能需防泡沫》，指ChatGPT概念板塊已有估值泡沫化跡象，整個板塊市盈率已高達136倍；又要求監管部門對蹭熱點、炒概念，以及股價操縱行為加強監控同打擊。網信辦隨即喺周二發布上述草案，擬對違規者，責令限期改正；拒不改正者，責令暫停或終止其利用生成式AI提供服務，並罰款1萬至10萬元人民幣；構成犯罪者，依法追究。
美國探討監管AI工具
除咗中國網信辦對監管AI服務發出徵求意見稿，美國商務部亦喺周二發出為期60日嘅諮詢文件，探討監管AI工具嘅問責措施，例如推出具有潛在風險嘅AI工具需否事先通過審查。越嚟越多國家擔心生成式AI潛在威脅之際，據新聞網站Axios報道，多間AI開發科企，包括OpenAI、微軟、谷歌、蘋果、Nvidia等，周三開會討論如何以最負責任嘅態度繼續開發AI，以及制定使用AI技術嘅準則。
本來復活假後復市，阿里巴巴同商湯喺自家AI模型「護價」下，周二都曾衝高破位，但監管風聲響起，陰燭收場；周三兩者仍是陰燭收場，兩者連續兩日都躋身成交榜第二、三位。市場點睇監管AI？大摩認為網信辦意見稿反映當局謹慎支持AI產業快速發展，並予阿里「增持」評級。阿里亦有新消息，微信公眾號「深廠」引述阿里廠友稱，阿里內地數字商業板塊（CDC）正進行業務調整，再將淘寶、天貓分家（於2011年6月分拆後，於2022年1月合併）。阿里早前宣布重組，六瓣業務中，最賺錢嘅淘寶天貓商業呢瓣阿里keep住，唔會分拆上市，依家呢瓣分家，似乎有後著。
割柑人
www.fb.com/hkstockpicker
本欄逢周四刊出
操盤手札記 - 割柑人 舊文
本文作轉載及備份之用 來源 source: http://hk.finance.yahoo.com