本港上市公司對雙櫃台充滿期待，現時已有23間公司申請增設人民幣櫃枱。
港股上周三失守牛熊線後冇力水反彈，無他，冇水自然冇力，上周四至昨日5個交易日，成交都不足千億。港股向來要睇中美兩邊面色，一來恒指成分股三分二為中資股，要睇中國政經變化影響；二來港元同美元掛鈎，要睇美國息口變化影響
。中國4月經濟數據不似預期，人民幣兌美元走弱，而美元其實並無走強，美滙指數5個交易日都只喺103水平徘徊，人民幣走弱反映內部經濟偏弱。中國復甦未有起色，中港股市亦難有起色。
美股外幣即時報價 多國新聞任睇
南水流向顯示，外資連續兩日沽A股，港股喺A股跌市下陪跌，昨收19115，跌1.6%，成交980億元。大市交投轉淡反映投資者入市意欲唔大，無乜人願意接貨。技術上，恒指跌穿兩個月嚟嘅橫行區底19500水平後，19000關口岌岌可危，短線或將退守3月低位18800關口。現時市場除咗繼續關注美國債務上限消息，亦關注明日出爐嘅美國個人消費開支（PCE）數據，預料對息口去向有更多啟示。
港交所下月推雙櫃台
南水流出A股之際，北水亦輾轉流出港股。誠然，北水對港股影響力日增，為便利北水買賣港股通股份免換滙，港交所（388）上周五宣布，6月19日推出「港幣–人民幣雙櫃台模式」。喺雙櫃台下，同一股份可用港幣計價，亦可用人民幣計價，並可同一日跨櫃台交易，例如買入同一股份嘅人民幣計價股票後，即日沽出港元計價股票。惟據報首階段未包括北水參與，要稍等待。
對內地資金嚟講，可直接用人民幣買港股，既省卻換滙使費，又避開滙兌風險，交易成本降低可能帶嚟流動性提升。對外地資金嚟講，現時約有30個國家與中國喺雙邊貿易中用人民幣結算，例如俄羅斯、伊朗等，中國用人民幣買石油、天然氣等商品，對方收到人民幣，可用作投資，雙櫃台就提供直接投資港股渠道。中外資金買港股更便利，但對推升港股，估計助力唔大。
五大科技藍籌已申請
點解？對內地資金嚟講，AH股差價最大問題係內地會對港股分紅徵收20%紅利稅，問題仍未解決；另外，雖然雙櫃台可減低滙率波動風險，但其實沽空美元已可對沖相關風險。而對外地資金嚟講，最大問題係地緣政治同中國政策不確定性嘅問題，唔係雙櫃台針對嘅問題。無論如何，本港上市公司對雙櫃台充滿期待，現時已有23間公司申請增設人民幣櫃枱，包括19隻藍籌股同準藍籌股京東健康（6618），合共佔恒指比重52%。
正值業績期嘅科技股中，藍籌ATMJX都已申請人民幣櫃枱。當中，阿里巴巴（9988）上周四晚派成績表，盈利好過預期，但績後股價不升反跌，跌回3月尾宣布重組前嘅80元邊緣（宣布重組後曾升至102元），皆因：①核心盈利來源中國商業（包括淘寶、天貓等）連續6季負增長；②雲業務收入首次無論按年或按季都減少；③整體盈利靠慳出嚟。不過，阿里仍有吸引力：①年度自由現金流達250億美元；②以市值2,200億美元計，扣除投資及現金減負債，市盈率僅6至7倍；③已申請人民幣櫃台，反映快將進入港股通。阿里再跌空間料有限，短炒可候80元樓下買，90元樓上沽。
割柑人
www.fb.com/hkstockpicker
本欄逢周四刊出
操盤手札記 - 割柑人 舊文
本文作轉載及備份之用 來源 source: http://hk.finance.yahoo.com