平民投資教室 - 錢俊 2023年6月20日
【平民投資教室】錢俊：加息靠嚇 追貨無有怕
平民投資教室
日期：2023-06-20
更新時間：09:33:29
上周美股終於爆Seed，一口氣突破一年高位。港股雖仍落後於人，但至少恆指能夠重新挑戰二萬點。其中一個誘因或者係美國上周終於一年以嚟第一次暫停加息。然而市場關注加息周期可能未完。
市場喺上周三美聯儲議息前已經估計今個月唔加，仲估七月加多次就收工，年尾更加會減息。然而議息會議後，顯示各議息官員對未來息口走勢嘅利率點陣圖顯示，無人想減息之餘，今年可能仲會加多半厘。
錢俊認為唔加或加多四分一厘機會較大。美聯儲官員主要係根據現時估計嘅經濟數據同通脹作出決定。然而若下半年出現黑天鵝，比如今年稍早出現嘅矽谷銀行危機，雖然至今無曬聲氣，但情況會否喺息口高企下死灰復燃甚至惡化，難以估計。
另外，美聯儲似乎喺度玩期望管理，先訂下較高息口預期，若果無黑天鵝出現而經濟繼續過熱，仍然有空間作出加息。若果數字平穩，唔加息又得，皆大歡喜。
市場就最客觀，議息後一天標指即升破4400點，證明市場唔太驚。當美股超買，投資者就有機會睇返港股，到時有機會追落後。投資者宜更積極分配好自己嘅股票投資揸緊機會。
2814：高追十隻美國重磅科技股
美股近月升勢淩厲，特別係代表科技股嘅納指回勇，今年已升31%。除咗之前介紹過香港上市嘅納指ETF，三星喺2021年都推出咗一隻三星NYSE FANG+ ETF（HKG:2814）。顧名思義，就係投資Facebook、Apple同Amazon、Netflix、Google，再加幾間知名成長型科技企業，包括NVIDIA英偉達、Tesla、Microsoft等等。上周已經講過，NVIDIA今年升咗170%。因此連帶呢隻ETF今年都升72%，回報可謂癲狂，以實貨兼無槓桿嘅ETF嚟計係今年香港上市最佳ETF。
想投資2814有幾個考慮。首先睇返成份，其實就只有十隻股票，上面已經講咗八隻，而每隻股票佔比都大致係10%上下。因此可以話幾低嘅分散度，因此波動性可以好大。今年升到笑哈哈，但其實2022年全年跌成41%。若以分散風險角度睇，買納指相關嘅ETF就較為穩陣。
另外就係費用問題。根據基金資料，基金管理費為0.65%，實際全年經常性開支比率估計為1.8%。以實貨大型股ETF嚟講真係唔平。當然你可以話，升跌咁多，果一兩個百分比微不足道。啱嘅，但其實嗰十隻股票，自己喺美股逐隻買都買到，咁就慳到個管理費，感覺好似較為劃算。然而，要買曬十隻股票大概需要兩千蚊美金，相比一手2814只係約兩千蚊港紙，而且持股比例可以做到平均分配，如果用於月供或小注購入就較為方便。
想聽其他投資Topic？話我知：chinjun.column@gmail.com
FB: chinjun.etf
IG: chinjun.column
以上觀點僅為個人分析，並不構成任何投資建議。
平民投資教室 - 錢俊 舊文
本文作轉載及備份之用 來源 source: http://hksmedia.com