【平民投資教室】錢俊：虛擬貨幣沒有錯
平民投資教室
日期：2023-09-29
更新時間：15:56:59
虛擬貨幣交易所JPEX事態發展持續至今，多位城KOL被捕。雖然事件鬧到滿城風雨，但錢俊想幫手平反一嚇，唔係為某KOL，而係為虛擬貨幣。
JPEX出事後好多投資者走曬出嚟話虛擬貨
幣呃人。事實係今年至今虛擬貨幣仍然係火紅之年，比特幣今年已升57%，以太幣亦升31%，比起今年最佳股市之一嘅日經平均指數26%回報更好。相比上次世界五大虛幣交易所之一FTX爆煲引發小幣災，今次明顯對幣市無影響。
雖然如此，錢俊唔係虛幣專家，要開戶口搵方法出金呢啲麻煩步驟已令我卻步。但可以用一啲基本投資常識去分析。最簡單，世上無免費午餐，買垃圾債券十厘以上已經係高風險投資，由其經歷過從前熱爆嘅內房債應該明白，因此差唔多廿厘回報做定期呢啲你真係要預咗有機會清零。
其次係投資產品流動性，一間公司製造一隻虛幣又只係喺自己平台交易肯定就有問題，加上無政府監管，大把主要買家可以輕鬆做市。之後當然就係交易對手及平台風險。搵最多人用、有強大背景甚或有牌嘅交易所同券商同交易呢啲都係基本。
BITQ：投資虛幣公司或可免一無所有
另一個可靠方法當然就係用ETF投資虛幣。一來上得市嘅ETF一定係受當地證監或政府監管，絕對合法。二來出金入金都係當股票買賣，唔會話突然之間出金要食你99%手續費呢啲情況出現。香港已經有兩隻分別係比特幣同以太幣嘅期貨ETF上市，如果你買是但一隻，今年已經至少賺28%。
當然之前都講過買虛幣期貨ETF嘅風險，比如期貨合約爆倉，甚或ETF供應商倒閉等等。同時期貨唔係實貨，走勢除咗存在差異，都會有高低水情況出現。另外其實都面對單一資產風險，比如比特幣爆煲都一樣係會清零。
直接買虛幣以外，都可以考慮間接方法，例如Bitwise Crypto Industry Innovators ETF（US:BITQ）就以投資虛幣經濟相關嘅公司，基金入面有29隻上市股票，好處就係無論ETF定全部投資都係受監管，而且嗰啲公司業務唔限於一兩隻虛幣，因此係捕捉緊成個市場生態同潛力。基金管理費為0.85%，年初至今已經升94%，嬴曬比特幣同以太幣兩隻虛幣。
有回報潛力又點少得風險？經歷過咁多風波都知虛幣波動性絕對係高，而且仲要面對未來多國政府可能收緊監管。BITQ今年回報看似理想，但現價比今年7月高位其實跌咗超過三成，因此可以話快上快落，屬短炒玩家市場。
想聽其他投資Topic？話我知：chinjun.column@gmail.com
FB: chinjun.etf
IG: chinjun.column
以上觀點僅為個人分析，並不構成任何投資建議。
平民投資教室 - 錢俊 舊文
本文作轉載及備份之用 來源 source: http://hksmedia.com