【平民投資教室】錢俊：香港ETF搞唔起之迷
平民投資教室
日期：2023-09-07
更新時間：12:53:54
有睇開錢俊都知我幾崇尚投資ETF，集多選擇、分散投資、涉獵其他市場及唔同資產類別、低費用等等。如此好嘅投資概念，香港雖然有多達三百隻上市ETF，卻只有盈富基金撐起成個市場。
香港ETF市場唔成熟，歸咎幾個原因。第一，香港人慣咗投資股票，你隨街搵個人都識得講兩咀股票投資，由其係中港股票。直至近期港股積弱，年輕人就衝曬去買美股，由買騰訊阿里轉去買亞馬遜。唔係話美國公司唔優勝，但炒個股風險高，研究時間長，其實唔值得一般忙人花時間。反而歐美好多人都係買基金或ETF buy and hold多於買個股短炒。
其次，係香港金融及銀行業運作模式不利ETF。香港唔少有啲錢嘅投資者，都會透過較高級嘅銀行戶口做投資，除咗貪佢上分行有免費咖啡，都有個客戶經理同佢傾計，當曬佢哋係投資明燈。事實係客戶經理都係sales要跑數，都會賣一啲跑到數同有回傭嘅投資產品，比如一般互惠基金同儲錢保險計劃。羊毛出自羊身上，最後呢啲產品管理費高昂，賺到錢係客戶經理而唔係客戶。
再者，無論政府定基金公司，對投資者教育嘅投入極少，亦都無心努力制造輿論。比如窩輪呢啲高風險嘢，反而會見到投資銀行喺地鐵大賣廣告，又捧呢個嗰個前新聞女神做輪後。需知道要努力先有回報，單有麝自然香係賣唔到成行成市。以下又一個例子。
3166：聰明啤打買中國
平安 MSCI 中國質量因子ETF（HKG:3166）係一隻以聰明啤打（Smart Beta）方式投資嘅ETF。一般被動ETF如恆指係追蹤大市指數，多數以某地區最大嘅市值公司為成份。而Smart Beta基金就會以其他數據納入成份股，比如係盈利增長、自由現金流等去定義公司為有質素公司。由於揀股都係以電腦數字主導，因此無須基金團隊及經理揀股，管理費又平一啲。
3166以MSCI中國指數成母指數，揀選入面嘅公司，而成份股有99隻，電商拼多多佔超過14%，其他包括茅台、農夫山泉，聯想等等。表現方面，上個月中港半浮沉下都升到8%，三年回報雖然跌32%，但比母指數跌約37%為好，可說係做到嘢。
然而基金公司喺推廣上可以話係零。首先一般投資者都無可能識咩係聰明啤打，公司網頁上又無解釋嚇都算啦。錢俊做資料搜集，除咗見到2018年上市時有啲新聞外，幾乎無宣傳。而且基金網頁簡陋，又唔靚無圖，講嚇隻基金嘅投資者教育又無，連基金嘅指數揀股標準都搵唔到，唔細睇基金章程根本無頭緒。真係好難覺得你真心想賣囉。
想聽其他投資Topic？話我知：chinjun.column@gmail.com
FB: chinjun.etf
IG: chinjun.column
以上觀點僅為個人分析，並不構成任何投資建議。
平民投資教室 - 錢俊 舊文
本文作轉載及備份之用 來源 source: http://hksmedia.com