港股今日期指結算，而今日適逢全國金融工作會議召開，為期兩日，喺外圍不靖下，若內地有利好消息，可望撐住港股。
達標？美國聯儲局睇重嘅通脹指標——剔除波動較大嘅食品、能源價格後嘅核心個人消費支出（Core PCE）物價指數，9月數據上周五出爐，按年升幅回落0.1個百分點至3.7%，係2021
年9月以嚟最低，符合市場預期，兼達到儲局預定今年底Core PCE 3.7%嘅預測；按月升幅則升0.2個百分點至0.3%，係今年5月以嚟最高，但符合市場預期。有「聯儲局線人」之稱嘅《華爾街日報》記者Nick Timiraos即晚撰文指出，當前通脹趨勢不足以令儲局今次議息加息（本港時間周四淩晨2時揭盅）。
美股外幣即時報價 多國新聞任睇
不過，市場對通脹回落速度放慢有所憂慮，加上以色列陸空部隊擴大喺加沙走廊嘅軍事行動，再加上美國戰機轟炸敘利亞東部伊朗伊斯蘭革命衛隊兩個武器彈藥庫以報復襲擊，中東局勢升溫，資金泊入金市、油市避險。上周五，現貨金升穿每盎斯2,000美元關口，係5月中以嚟首次；布蘭特期油收每桶90.44美元，升2.9%，紐約期油收每桶85.16美元，升2.3%。美股道指、標指分別跌1.1%、0.5%，納指則升0.4%。美債10年期孳息受制4.9厘關口，收4.845厘；美滙指數靠穩，收106.58。
過去5次會議 都撐住港股
港股夜期收17175，低水223點；港股ADR比例指數收17165，低水233點。藍籌中槪科網股ATM，美國股價分別較香港低1.7%、1.5%、1.8%。港股今日期指結算，而今日適逢全國金融工作會議召開，為期兩日，喺外圍不靖下，若內地有利好消息，可望撐住港股。恒指上周五收17398，睇技術走勢，上周喺16900水平見支持，營造小雙底，加上8月以嚟14天RSI出現三底背馳，有利後市繼續反彈，先上望50天線17800水平。
全國金融工作會議係針對金融領域召開嘅最高規格會議，由國家主席或國務院總理主持，中央政治局常委、各省區市黨委書記，以及央行、證監會負責人等出席。今次焦點落喺化解金融風險上，包括房地產債務、地方政府債務等。該會議以往開過5次，分別喺1997年11月、2002年2月、2007年1月、2012年1月、2017年7月，基本上5年一次，事隔6年再開，勢將為資產規模達450萬億元人民幣嘅中國金融業，排定政策優先事項。
睇返過去5次會議對港股嘅影響，第一次會議正值港股經歷97股災，會議後港股回穩5個月先再跌；第二次會議後，港股止跌回升3個月；第三次會議後，港股先跌1個月再展開8個月升市；第四次會議後，港股先升兩個月再跌3個月再展開8個月升市；第五次會議後，港股當月大陽燭拉升，隨後再升半年先見頂。以過往經驗睇，5次會議都撐住港股，今次又撐唔撐得住？拭目以待！
港交所業績 靠定存收息
市場上周憧憬特首嘅《施政報告》會對港股帶嚟助力，但失望而回。特首提出嘅提振股市措施包括：①下調股票印花稅，由0.13%回歸0.1%；②檢討買賣差價；③降低資訊費用；④改革GEM市場；⑤持續促進發展。當日港股由高開473點，到發表《施政報告》，升幅腰斬再腰斬，收市只升93點；港股「縮影」港交所（388）更倒跌4.1%收場。市場唔受落，一來減印花稅係預期之內，而減幅無驚喜；二來港股低迷嘅主因，並非印花稅。
至於港交所，雖然喺港股成交連跌3年、IPO大幅萎縮下，早前派嘅成績表，首三季溢利仍增31%，但溢利大增主因投資收益由負轉正，有11.8億元（上年同期蝕4.2億元），最大貢獻係銀行存款，港交所不愧為「真‧定存KOL」！不過，靠定存收息嘅業績頂得幾耐？定存高息皆因美國加息，明年美國隨時減息，港交所點算？除非中港股市回穩、交投轉旺、IPO重振，港交所先有得救。
割柑人
www.fb.com/hkstockpicker
本欄隔周一刊出
操盤手札記 - 割柑人 舊文
本文作轉載及備份之用 來源 source: http://hk.finance.yahoo.com