如果錯過咗NVIDIA（NVDA），不妨留意中興。 (BING-JHEN HONG via Getty Images)
望見40000點喇！講緊嘅係日股，唔係沈大師預言嘅港股。據Investing.com數據，上周五，日經指數觸及40000，收39940，升1.9%；此外，美股道指收39087
，升0.2%，前周五曾高見39281，上周五守39000關，繼續向40000關進發，標指、納指就分別升0.8%、1.1%破頂。港股上周五收16589，升0.5%，夜期低水3點，ADR比例指數低水12點；不過，納斯達克金龍中國指數反彈1%，兩會將分別於今明兩日召開，中港股市將有支持？
美股外幣即時報價 多國新聞任睇
恒指上周喺16300至16800上落，睇日線圖，受制上年8月上旬以嚟嘅阻力位100天線（現處16728），但回調冇失守1月下旬以嚟嘅上升軌16000關，反覆向上格局，上望1月頭高位17100關；再睇周線圖，連續兩周喺20周線（現處16638）爭持，但已升穿上年8月頭以嚟嘅下降軌，勢將挑戰上年1月尾以嚟嘅下降軌17700關；睇埋月線圖，1月大陰燭同2月陽燭呈「身懷六甲」轉勢形態，料將挑戰20月線同牛熊線滙聚嘅18200關。恒指短中長期阻力，就集中喺17000至18000水平。
設備及消費品更新 兩會料添政策
人大會議、政協會議（兩會）能否為股市帶嚟動力？市場主要係睇GDP、通脹率、赤字率、政策安排等。據中金報告，2000年以嚟，上證指數喺兩會前後20個交易日，平均升幅分別為2.5%、4.1%；另據招商證券報告，2010年以嚟，內地股市各大寬基指數喺兩會前兩周、前一周表現較好，兩會期間表現略差，兩會後一周、後兩周則上升機率超過50%。A股上升，可望拉升港股，反之亦然。
中國正在面對複雜嘅外部環境同經濟結構轉型，消費取代投資，成為驅動經濟增長主力。兩會政策通常延續中央經濟工作會議布局，招商證券因而建議關注數字經濟、人工智能、生物製造、生命科學等範疇；中金亦建議關注科技創新、國企改革、設備更新、消費品等範疇。近期中央財經委員會推動新一輪大規模設備更新同消費品舊換新，估計兩會後會有更多相關政策出台。
中興受惠設備更新 現價估值偏低
講到設備更新，由ChatGPT掀起嘅AI（人工智能）產業浪潮席捲全球，同AI設備相關嘅公司，確係有設備升級嘅需要，中興通訊（763）正係設備更新受惠股。中國三大電訊運營商——中國電信（728）、中國移動（941）、中國聯通（762），肩負AI算力中心賦能各行業提質增效嘅重任，都正在加大投資算力中心，帶動伺服器、轉換器等設備需求。中興研發嘅新一代算力基礎設施，包括AI伺服器、AI加速晶片，以及上年底推出支持ChatGPT嘅大頻寬GPU伺服器等。
據《南方財經》上周四報道，中興近日申請註冊多個衛星通訊商標，包括「星雲」、「星雲OS」等。同時，中興喺上周巴塞隆拿舉行嘅世界移動通訊大會宣布，今年將發布自主研發嘅AI大模型同首款AI旗艦終端，將喺星雲OS支援下打造全場景智慧生態3.0。中興業務近年由5G設備拓展至AI設備，雖然商業模式較複雜，但整體毛利率都喺35%以上。該股上周五收17.6元，預測PE僅7.8倍，估值偏低。喺AI浪潮下，如果錯過咗NVIDIA（NVDA），不妨留意中興。
割柑人
www.fb.com/hkstockpicker
本欄隔周一刊出
操盤手札記 - 割柑人 舊文
本文作轉載及備份之用 來源 source: http://hk.finance.yahoo.com