中環在線：恒大董事逼不得已「被跳船」 - 李華華
董事跳船，通常都唔係好嘢，但係呢排有啲董事「被跳船」，確係逼不得已。恒大地產(3333)噚晚宣佈，徐湘武及何妙玲辭任執行董事，今個月23號起生效，但會繼續擔任公司副總裁。為乜唔做董事？皆因港交所(388)改例囉。
港交所改例犧牲執董
話說去年底港交所修訂上市規則，要求上市公司委任嘅董事局，至少有三分之一成員係獨立非執行董事，但係董事局最少有3個獨董嘅規定就無變。新例出年生效，即係要喺今年12月底前達標。咁即係話，如果董事局規模龐大，咁就要有相應數目嘅獨董，發揮足夠監察作用。
恒大董事局原本有8位執行董事同埋3位獨立非執董，即一共11人，根據新例，8個執董相應要有4個獨董，但係講真，啲上市公司一直都話搵人做獨董唔容易，恒大家得3位獨董，惟有割咁忽肉，等個董事局人數少啲，咁咪容易搞囉，所以有兩個執董要「壯烈犧牲」。
講開搵獨董難，恒大真係感同身受，因為噚日公司同時宣佈，餘錦基以健康同埋計劃逐步辭任所有商業及社會職務、邁向全面退休為由，辭任公司獨立非執董。好彩公司搵到華南理工大學工程訓練中心副主任謝紅希頂上，至湊夠獨董人數咋！
李華華
mailto:LiWaWa@AppleDaily.com
上一則: 上周五10大沽空股份
下一則: 中環在線：溫兆華過檔招證挑戰大 - 李華華
中環在線 - 李華華 舊文