金融High Tea 2012年6月14日
金融High Tea——貨少焗追
2012年6月14日
■昨推高大市的主力係兩地金融股，滙控臨尾發力，升1.6%至64.5元。
■圖為思捷行政總裁兼執行董事Ronald van der Vis。
呢個世界搵食要冒險，時近六月底半年結，買股在30日收市價見真章，當中仲要捱今個星期日希臘個選舉，但昨日仍然有買盤湧吓湧吓買貨，除了話之前淡倉好多市一升就要平倉之外，大家早前太驚手上貨太少都係原因之一，見內地個市有可能見咗底(只是可能)，只有焗追。
淡友比較怯，最適合夾吓佢。好似噚日個市，港股早段先跌，但跌近18800點就落唔到，然後一級級炒番上。咁仲唔夠喉，即市期指淡友未願平倉，正股臨收市前10分鐘再大幅抽上60、70點，期指淡友只有棄械投降。恒指收市重越19000點，以全日最高位收市，收19027點，升154點，少少哋升0.8%。國企股表現仲勁，國企指數升139點至9658點收市。大市成交增加至465億元，依然略淡。無計，希臘國會大選在即，投資者博都唔敢博咁盡。
產業升級睇好科網股
阿爺出招內地轉暖，看好的聲音亦多了，霸菱資產管理香港中國股票主管鄧鴻文話，今年初佢哋旗下基金開始增持內房股及券商股，主要因為它們是政策敏感行業。如今看內房股仍有價值，目前股價已反映十多數風險，只要開發商肯減價10至15%，可以去貨。佢亦看好科網股，估計未來10年內地產業升級，科技公司將受惠。但對內銀股看法相對負面，惟目前估值偏低，而且有5至6厘股息，不失為一個投資選擇，看好工行(1398)及建行(0939)等大型銀行。
好多人問我點睇不同類別內地股，我話生意快改善的是內房、建材，長期受壓是內銀，如果你唔係做人世，只是揸一段，巨型內銀6倍幾市盈率、5厘幾息，只係一個平字。當然亦有中國大好友，如商品大王羅傑斯，佢話近排雖然唔敢買股票，但睇好中國市場，在大跌市時中國股票，買入後只買不賣，要畀自己個女。香港股民多數無咁豪氣，揸幾個月走一轉的人多，長揸唔放的只屬少數。
昨日推高大市的主力係兩地金融股，匯控(005)臨尾發力，升1.6%至64.5元。內地有報道指6月第一個星期，四大國有銀行工行(1398)、建行(939)、中行(3988)及農行(1288)，新增貸款只有66億人民幣，反映信貸市場並沒有如期出現回暖狀態；四大行存款較上月末大幅下降2720億元。幾大行昨日升得唔錯，市場唔怕上述消息，係信如果最後貸款唔夠多，到下半月時阿爺又會谷番上去。
中資保險股亦表現強勁，有消息指中保監正研究推出13項改革保險投資政策。當中包括允許保險機構開展融資融券業務、參與境內境外金融衍生品交易等。阿爺陸續泵水入市場，有關當局又將放寬投資限制。國壽(2628)更升3.7%至19.32元，係表現最好藍籌股。太保(2601)仲勁，炒高近半成至24.95元。
思捷又有高層跳船
昨日跌得最痛的大隻股係思捷(330)繼財務總監劈炮無幾耐，公司執行董事兼行政總裁Ronald van der Vis突然宣佈因個人理由唔撈。兩個人都係公司主持「轉型大計」的靈魂人物先後離去，使市場懷疑「轉型」能否成功。思捷股價昨日應聲重挫，大裂口跌穿10天與20天線，半日跌幅逾兩成之後仲停埋牌。停牌前更插21.8%至10.54元，連睇得最淡的里昂的已下調目標12.5元都失守埋，歐洲市場咁淡，思捷已成為超級弱股。
陸羽仁
上一頁 下一頁
金融High Tea 舊文