陸羽仁 BLOG 2012年7月23日
舞上舞落
2012/7/23 9:28:35
網誌分類: 經濟
美股反彈咁耐終於要抖抖，杜指由一周前的12499點反彈至上周四的最高12970點，勁升470點，到上周五回吐，急滑120點，回調得都幾醜樣。當日杜指開波跳水85點之後一路向下，彈都唔彈，以接近全日最低位收市，跌121點至12822點。
大市向下主要受歐債危機再度告急拖累。據外電報導，歐元區17國財長已經口頭上批准撥出最高1000億歐元救援西班牙銀行業，按照協議，所有救助資金將於明年年底前全部支付。至於具體的救援資金數字，要等西班牙詳細審計該國銀行業之後至知。
不過，呢個消息未能緩解投資者對西班牙銀行業危機的憂慮。評級機構Egan-Jones指出，西班牙銀行業的壞賬可能還包括與房地産市場惡化無關的其他資産，又估計西班牙經濟在2014年之前都唔會有增長，遂將西班牙評級降至CC+，為11個評級中倒數第3級，屬垃圾級別。西班牙10年期國債息飆上7.3厘的歷史高位，嚇到投資者雞飛狗走。西班牙股市暴跌5.8%，亦拖累整個歐洲股市平均下滑1.4%。歐洲金融股重創，美國金融股自然無運行，跌到七個一皮，杜瓊斯金融指數跌1.4%。摩根大通跌1.6%，美銀插2.6%，係表現杜指成份股。
美企陸逐公佈第二季度業績。資料顯示已派成績表的標普500企業，有69%的企業盈利好過市場預期。不過，超過預期上限的只有42%，反映美企盈利增長有放慢趨勢，好過預期的公司多，只是預期低而矣。尤其係有唔少的科技公司，利潤不但遜於預期，按年計也未見改善。
紐約ConvergEx首席分析師Nicholas Colas指出，近期市場對2012年下半年的企業盈利預期不斷降低，而企業亦自降預期，控制期望，標普1500家成份股中，有792家公司下調了了盈利前景，調高的只有323家。當中以科持公司對前景睇得最淡，呢個情況係2009年以來最差。
市場現時預計美國第三季GDP增長只有1%至1.5%，第四季有3.9%，不過 Nicholas Colas認為除非美元轉弱，美國第四季唔可能有咁高的增長。
我估美國市受聯儲局在未來一兩次會議可能搞QE3影響，跌也未必會無底深插，而好似香港、南韓等新興市場就俾人舞上舞落，升跌都誇張過人。
陸羽仁
回應(1) 我想回應
陸羽仁 BLOG 舊文