中環在線：合和胡太越玩越大件 - 李華華
唔少城中闊太鍾意投資物業，賭王四太梁安琪同廖創興家族成員廖湯慧靄炒到街知巷聞，市場有親大買賣都估吓係咪佢兩位出手，原來合和(054)主席胡應湘夫人郭秀萍近年亦積極玩埋一份，由上環分層寫字樓開始，買到中環成幢服務式公寓，越買越大件，至今賺咗兩億。
08年蝕4500萬交學費
胡太鐘意跳舞、畫國畫就係人都知，估唔到投資物業亦有一手，但就唔係一開始有錢賺。翻查紀錄，胡太08年開始高調投資物業，一出手已經拎成4.6億，買起兩層上環中遠大廈同一層灣仔順豐國際中心寫字樓。
可惜未上會就俾金融海嘯浸過頭，胡太即刻止蝕，將中遠大廈兩層撻定，蝕咗4500萬。灣仔件貨兩年後先沽到，微賺100萬，未必夠冚使費。
經此一役，胡太無就咁收山，反而好勇。09年再去番上環搵盤，搵正中遠大廈隔離嘅新紀元廣場，過億掃咗一層小試牛刀，一年貨仔賺咗4400萬。
胡太食住個勢越買越豪，仲升呢去到中環搵盤，一擲8億買入指標寫字樓皇後大道中九號同擺花街壹號廣場地舖加7層寫字樓。胡太家仲揸住皇九，早排叫價4.4億想沽但未沽到，壹號廣場件貨就上個月沽曬，勁賺2億。
唔知胡太係咪收到乜嘢風，還是嫌濕碎，近年唔再買分層寫字樓，仲轉買成幢樓，早兩個月用6億買成幢服務式公寓「Shama Central」，又繼續攻商舖。睇嚟市場以後有乜大買賣，都要預埋胡太一份！
李華華
mailto:LiWaWa@AppleDaily.com
上一則: 內房公積金加強監管
下一則: 中環在線：利豐衰咗Spencer贏咗? - 李華華
中環在線 - 李華華 舊文