中環在線：工銀國際唔吼散戶 - 李華華
金魚缸靜英英，每日成交得三、四百億，大、細經紀都要拍烏蠅。聽聞，工銀國際最近決定摺埋零售證券同期貨部門，唔做散戶生意，以後集中做機構投資者同投資銀行兩瓣。
工銀國際08年成立，取代工行(1398)同東亞(023)合資成立嘅工商東亞，主要做投行業務，但都有機構投資者同散戶證券買賣，早幾年有批手上有好多大客嘅經紀過檔工銀國際，諗住有個大靠山。
摺埋零售主攻大茶飯
可惜過去大半年，股市靜過鬼，好多客唔係輸錢，就無心戀戰，搞到呢班經紀越嚟越得閒。佢哋冇生意，工銀國際都要照畀燈油火蠟。
高層見唔對路，決心摺埋散戶呢瓣。聽講，工銀國際今年初已經裁咗一批經紀同後勤，今個月裁埋剩餘嘅經紀，兩批夾埋走咗約50人。好似話，零售部門下個月就會正式收檔，工銀國際以後主攻機構投資者同資產過億嘅大客，投資銀行亦會大搞。
查實工銀國際嘅投行部門今年初亦有一次重大人事變動，成隊人走曬咁滯，之後慢慢請番人。雖然話想大搞，但今年新股或配股市場認真麻麻，幾間外資投行唔夠生意都炒緊人，想做好呢瓣唔易㗎。
李華華
mailto:LiWaWa@AppleDaily.com
上一則: 黃金集團擬入股非洲同業
下一則: 中環在線：金華菠蘿包保得住！ - 李華華
中環在線 - 李華華 舊文