金手指：借爆Grant Loan抽iBond - 孫柏文
孫柏文呢幾日都聽到好多人講兩個原意係福利嘅議題。一就係政府為大學生提供嘅低息貸款，大學生攞來「非原意運用」。第二就係政府出嘅iBond(4214)，因為派息同政府計嘅「政府統計處甲類物價指數」掛鈎，亦因該率跌到得1.6%。
咁我聽完兩個議題嘅詳情後，第一個反應就係：「借爆Grant Loan抽iBond！」不過今日講點解之前，我想同批准iBond嘅人講聲：「我都話咗啦，警告咗你又唔聽。」
iBond息睇甲類物價指數
我講過啲乜？記得政府第一次搞iBond(4208)時，我叫所有想抽嘅人諗吓iBond嘅回報係建基喺乜上邊？如果答：「通脹囉。」咁就錯曬，因為係建基喺「政府統計處甲類物價指數」上。
有乜分別？前者係上億件貨品、服務交易或標價時，因貨幣供應太快，出現貨品普遍貴咗。後者可能係一個篤出來嘅數。我亦問，究竟知唔知係邊個計？不知名程度有如嗰啲乜都唔畀你睇，連相都冇，不過又add你做朋友嘅facebook用戶(圖)。更重要係，邊個可以決定點計呢個指數？
當時，我已嚴重警告，推iBond之後，一個之前帶濃烈學術味道嘅官員，一個只作參考嘅數據，會搖身一變成為政治嘅血肉戰場。將會有各黨各派、「獨立人士」嘅抽水政客，「強烈要求」政府「正視」。原本計「政府統計處甲類物價指數」嘅嗰位官員，已面對好多以上講過嘅技術性問題，家仲要淪為政場炮灰，大鑊。
買人心不成變計時炸彈
試問，未有iBond之前，如果政府話甲類物價指數升咗1.6%，大家首先唔會質疑計法，而政府就可開曬香檳話成功控制物價。家？咪話「通脹未解決、計法有問題」囉。我想問政府，為一個原本係想收買人心，經濟上嘥社會資源，福利上補貼啲有幾十萬元嘅有錢人嘅政策，搞到好似計時炸彈咁，日後爆管治危機，值咩？Oh wait，前特首曾蔭權已走咗。
講番借爆Grant Loan抽iBond。我冇喺香港讀大學，所以同嗰啲成績唔好，一早出來做嘢嘅朋友一樣，只有交稅夾錢，冇份享用。睇噚日報道，最正一定係恒生管理學院商學院院長蘇偉文，佢話：「教育已經係對自己最好嘅投資，係咪真係要賺到盡，學生真係要諗吓。」以我推斷，正式回應就係咁講，不過蘇院長佢心裏諗：「你班仔妹，如果讀完恒商都唔識走去借盡呢筆平錢，真係唔去走去話係我哋嘅"alum"囉，啋！」因為如果利息一厘，用上市價計iBond最少都一厘，以特區政府信貸穩健程度，最多輸手續費。
仲有，如果甲類指數高，揸iBond就冇問題。不過如果喺全球咁樣印鈔票嘅情況下，都出現通縮的話，等於有歐洲爆大鑊級數嘅金融危機發生，銀行信貸系統已心臟病發，完全停頓。咁就係iBond真正贏大錢嘅機會！點解？大家計來計去，都係政府派幾多息，忽略嘅係當全球銀行都冇人信時，資金就要搵避風塘，試問有乜疊水過我哋特區政府呀？到時，如無意外，喺公開市場買iBond，唔好話一厘，我絕對相信用公開市場iBond成交價計，會係負利率，即係啲人用溢價搶iBond。
我哋香港，由開埠已來，一路嘅核心business model，就係借人哋唔識用嘅錢，低價買嘢，做caretaker，之後沽畀啲出高價嘅「有需要人士」。所以，如果今時今日啲學生能讀書時已咁做，我就卒之放心，香港嘅DNA唔會喺廢青當道嘅氣候下滅亡。
孫柏文
作者為獨立股評人
本欄逢周二、四刊出
上一則: 貨幣滙價
下一則: 曾淵滄專欄：等放水等到唔耐煩 - 曾淵滄
~TITLE_S~金手指 - 孫柏文 2012年8月23日 舊文