金融High Tea 2012年8月17日
金融High Tea——天與地
2012年8月17日
昨日港股跌唔多，只係跌89點，但係衰在連2萬點大關都插穿埋，認真唔老嚟，關鍵在一隻中移動(941)，佢中午公佈中期業績，半年僅多賺1.5%，最後插咗5%，一隻股拖累恒指跌91點，如果中移動好似匯控(005)咁無起跌的話，大市就唔會跌。
騰訊(700)和中移動比較是天與地。騰訊上日公佈中期業績，半年純利60.5億元人民幣，同比增加15.9%；其中第二季業績亮麗，純利為31億元，較第一季增加5.1%，和去年同期比較更增加32%。去年底市場有啲擔心騰訊盈利已見咗頂，去年11月佢股價一度低見139.8元，之後一直回升，昨日業績好更大升6％，收244.6元，呢個價和低位比大升75％，真係驚人。單係騰訊升6.3%，已帶動恒指升53點，佢升多多都唔夠中移動敗晒。
中移動次季倒退
中移動中午公佈中期業績，半年純利有622億元人民幣(下同)，每股盈利3.1元，差過市場預期。若拆開第二季數字睇，第二季純利只有344億元，比一年前同期的344.2億純利出現倒退，盈利表現是13年來最差。劇烈競爭是中移動盈利不前的主因，對手特別是聯通(762)拉開減價戰。中移動今年上半年的ARPU由之前的73元降至67元，中移動副總經理兼財務總監薛濤海話，公司新增用戶大部份均是低用量及使用低端機，令收費有下降跡象。他講的原因只是部份因素，高端市場的劇烈競爭同樣拉低APRU。
中移動在6月底時有6.8億個手機客戶，包括6710萬個用3G的高端智能電話客戶。聯通在同期雖然只有2.2億個手機客戶，3G客有5750萬個，實數相差中移動不太遠，按比例計更高很多。中國電信(728)則有1.4億個客亦有5100萬個3G客。3G市場未打完，就快又打4G，中移動表示要比原先估計再額外多投入60億去補貼手機價。
中移動去年純利1260億，用多60億補貼手機價去打仗，都等如接近5％純利。市場睇完中移動份中期業績，估佢全年可能只是多賺1％，比去年的5％差。
流入中電信避險
中移動的股價走勢都弄出一個殺人陷阱，中午公佈業績後，開市跌幅擴大至2%左右，雖然跌破90元關口，但仲守得住20天線，吸引唔少散戶追入中移動認購證，博佢反彈。點知一點半後愈跌愈有，最後唔止20日線、連50日線都穿埋，追入馬上中招。
昨日聯通都跌0.7％，相反中電信卻逆市升0.5％，因為聯通高達55.1倍市盈率，中電信市盈率只有16.2倍。中電信的確較弱，但勝在客戶基數低，中移動已經有近7億個客，向上增長的想像空間真係唔多啦，市場一直擔心中移動業績由升轉跌，現時出現這種可能性，係市場霸主的噩夢。
陸羽仁
上一頁 下一頁
金融High Tea 舊文