投資的天空 - 張士佳 2013年1月11日
投資的天空：入市要睇值博率 - 張士佳
大市悶了數天再發力，期指借內地出口數據勝預期下，一度升穿早前高位23450，筆者早兩日話見到券商大合奏，散戶又開始高談闊論講?巴，需要提高警覺，現階段睇好似過慮了，好在自己雖然無加貨，但亦無作特別減持，除了因先前已於23200將衍生工具好倉套利，令自己可以坐得安心一點外，是手中大部份個股並未出現減持訊號，所以一動不如一靜。
太陽能概念炒過龍
其實大市無大焦點，今日不如講多點個股情況。股票炒風仍然非常熾熱，好似太陽能板塊，自畢菲特購入太陽能項目後一直瘋狂上升，雖然昨日下午忽然掉頭，但累積升幅咁多，有人套利都係平常，而且回調亦是好事，起碼可以提醒投資者炒還炒，唔好見不斷升就大無畏高追，值博率始終係買股票的關鍵。
對筆者而言，太陽能是概念多於實際，所以近日趁高減持了部份，唔全部減持是因為概念將來可以漸漸變成泡沫，大市旺起來泡沫可以不斷壯大，既然有利潤就留點來坐，但短期來說，概念炒過龍了，想買的讀者都係等佢有明顯調整後才考慮吧。
另外，頁岩氣概念股上年係股王，今年暫時卻變了狗仔。這個始終係大概念，雖然個股升幅巨大，但實際上只炒了半年，話玩完可能言之過早，如之前所言，待板塊出現支持仍可以一試，而近日幾隻概念股的走勢，正好反映市場對他們虛實之分的看法，不妨作揀股對象參考。
最後一提是昨日逆市下跌的內房股，相比起上述兩個板塊，內房股的概念成份少得多，雖然城鎮化對內房早前的升勢有推波助瀾之用，但事實上，近月內房股的銷情確實反映了這數年壓抑的需求逐漸釋放，會係趁低吸納必選板塊之一。
張士佳
元大寶來證券(香港)業務及商品發展總監
與曾卓鋒(元大寶來證券(香港)客戶經理)聯合執筆
(逢周三、五刊出)
上一則: 青心直說：中興究竟衰邊瓣 - 胡孟青
下一則: 炒友Blog：莊士低於三折大平賣 - 邱古奇
投資的天空 - 張士佳 舊文